रवि लामछानेयात ज्वनेगु तयारी, पक्राउ पूर्जी जारी जुल

येँ (नेपालभाषा टाइम्स)÷ सहकारी ठगी प्रकरणय् राष्ट्रिय स्वतन्त्र पार्टीया अध्यक्ष रवि लामिछानेयात ज्वनेगु तयारी जूगु दु । लामिछानेयात ज्वनेगु निंतिं शुक्रवाः सनिलय् प्रहरीया छगू पुचः रास्वपाया केन्द्रीय कार्यालय बनस्थलीइ थ्यनेधुंकूगु दु ।

लामिछानेयात ज्वनेगु निंतिं शुक्रवाः कास्की जिल्ला अदालतं पक्राउ पूर्जी बिउगु खः । सहकारी ठगी प्रकरणं लामिछाने लिसें झिप्यम्हेसिन ज्वनेगु निंतिं जिल्ला अदालतं छक्वलं पक्राउ पूर्जी जारी याःगु खः । लामिछानेयात सूर्यदर्शन सहकारीलगायत थीथी सहकारीं त्यासा कयाः गोर्खा मिडियाय् हःगु ध्यबा अपचलन याःगु खँय् संसदीय छानविन समितिं दोषी ठहर यानातःगु दु । लामिछाने गोर्खा मिडियाया प्रबन्धक जुयाच्वंगु इलय् सहकारीया ध्यबा अपचलन याःगु खः ।

लामिछानेयात ज्वनेधुंकाः कास्कीइ हे यंकाः अन हे प्रहरीं बयान कायेगु लिसें अनुसन्धान ज्या न्ह्याकी । लामिछानेयात ज्वनाः कास्की यंकेगु इलय् प्रतिकार यायेगु तयारी रास्वपां यानाच्वंगु दु । थुकिया निंतिं रास्वपया गण्डकी प्रदेश कमिटी व कास्की कमिटीया आकस्मिक मंकाः बैठक च्वंगु दु । कास्की प्रतिकार यायेगु तयारी यानाच्वंगु रास्वपां लामिछानेयात ज्वं वइगु इलय् धाःसा प्रतिकार मयाइगु खँ धाःगु दु ।

रास्वपाया नेतातय्सं लामिछानेयात ज्वनायंकल धाःसा थःपिंसं प्रतिकार मयायेगु धाःगु दु । रास्वपाया छम्ह नेतां थःपिंसं कानुनया पालना यायेगु खँ न्ह्यथँसें लामिछानेयात ज्वनेगु इलय् प्रतिकार मयायेगु खँ धाःगु खः । प्रतिकार मयायेगु धाःसां रास्वपाया नेता कार्यकर्तात धाःसा केन्द्रीय ज्याकू बनस्थलीइ मुनाच्वंगु दु । लामिछाने नं थःगु ज्वनेगु निंतिं पक्राउ पुर्जी जारी यायेत्यंगु सुचं वयेवं संसदीय भवन बानेश्वरं थःगु गाडीइ मच्वसें उपसभापति डीपी अर्यालयाया गाडीइ च्वनाः पार्टी कार्यालय वंगु दु ।