स्पेन, क्रोएसिया व सर्बिया विश्वकपय् छनोट, पोर्चुगलं प्लेअफ म्हितीगु

एजेन्सी÷ सन् २०२२ य् कतारय् जुइगु विश्वकपया निंतिं स्पेन, क्रोएसिया व सर्बिया छनोट जूगु दु । युरोपियन छनोट अन्तर्र्गत आइतवाः बहनी जूगु कासाय् स्पेनं स्वीडेनयात, क्रोएसियां रसियायात व सर्बियां पोर्चुगलयात बुकाः विश्वकपय् थाय् दयेकूगु खः ।

स्पेनं स्विडेनयात १–० गोलं बूकुगु खः । स्पेनया मोराटां ओल्मोया पासय् गोल याःगु खः । स्पेन झ्वलाकः झिंनिक्वःगुखुसी विश्वकपय् छनोट जूगु खः । कासाय् पराजित जूगु स्विडेनं धाःसा विश्वकपय् छनोट जुइत प्लेअफ म्हितेमालीगु जूगु दु ।

आइतवाः हे जूगु मेगु कासाय् रसियायात बुकाः क्रोएसियां विश्वकपय् थाय् दयेकल । क्रोएसियां रसियायात १–० गोलं बुकूगु खः । रसियाया डिफेन्डर फेडोर कुड्रयासोभं याःगु आत्मघाती गोलं यानाः रसिया पराजित जूगु खः । विश्वकप छनोटया निंतिं रसियायात बराबरी जक याःसां गाःगु खः, तर कासा बूगुलिं रसियां नं प्लेअफ म्हितेमालीगु जूगु दु ।

अथेहे सर्बिया नं विश्वकपय् छनोट जूगु दु । सर्वियां पोर्चुगलयात बुकाः विश्वकपय् थाय् दयेकूगु खः । छगू गोलं लिउने लानाच्वंगु सर्बियां पोर्चुगलयात २–१ गोलं बुकूगु खः । कासा बराबरी जक जूगु खःसा पोर्चुगल तप्यंक हे विश्वकपय् छनोट जुइगु खः, तर आ पोर्चुगल नं प्लेअफ म्हितेमालीगु जूगु दु । कासाय् सर्वियाया डुसान टाडिक व एलेक्सान्डर मित्रोभिकं गोल याःगु खःसा पोर्चुगलया रेनाटो सान्चेजं गोल याःगु खः ।

छनोटया मेगु कासाय् आयरल्याण्डं लक्जेमवर्गयात ३–० गोलं, स्लोभाकियां माल्टायात ६–० गोलं बुकलसा ग्रीस व कोसोभंो छगू छगू गोलया बराबरी म्हितल । अथे हे जर्मनीं आर्मेनियायात ४–१ गोलं, नर्थ म्यासेडोनियां आइल्याण्डयात ३–१ गोलं व रोमानियां लिचेस्टाइनयात २–० गोलं बुकल ।

सम्बन्धित बुखँ

LEAVE YOUR COMMENTS