नेपाली क्रिकेटं काःगु सफलता
नेपाःया कासा ख्यलय् क्रिकेटं वंगु छुं ई न्ह्यः जक तःधंगु व महत्वपूर्ण सफलता प्राप्त याःगु दु । नेपाली क्रिकेटं अन्तर्राष्ट्रिय क्रिकेट काउन्सिल (आईसीसी)या सदस्यता काःगु स्वंगू दशक लिपा एक दिवसीय क्रिकेटया मान्यता कायेत सफल जूगु खः । एक दिवसीय क्रिकेटया मान्यतालिसें नेपाःया क्रिकेट ख्यलय् छगू न्हूगु अध्याय नं शुरु जूगु दु । नेपालं काःगु एक दिवसीय मान्यताया थ्व ऐतिहासिक उपलब्धिलिसें क्रिकेटय् छगू अवसर व हाथ्या नं दं वःगु दु ।
नेपालं न्हापांखुसी काःगु थ्व सफलतालिसें नेपाली क्रिकेटयात कयाः थ्व इलय् चर्चा नं उतिकं जुयाच्वंगु दु । नेपाली क्रिकेटया राष्ट्रिय संस्था क्रिकेट एशोसियन अफ नेपाल (क्यान) दुनेया अनेक विवादया दथुइ नं नेपाली क्रिकेटं कायेफुगु थ्व सफलता निश्चित रुपं समग्र कासामि, क्रिकेटया समर्थक व प्रशंसकतय् निंतिं तःधंगु लसताया खँ खः । एक दिवसीय मान्यतालिसें आः वइगु प्यदँ तकया निंतिं नेपाली क्रिकेटं आपालं अवसर प्राप्त याये खनी ।
सन् १९८८ लय् नेपालं दकलय् न्हापां आइसीसीया सदस्यता काःगु खःसा सन् १९९६ य् एसोसियट राष्ट्रया मान्यता काःगु खः । थ्व क्रमय् वंगु छुं दिं न्ह्यः जक नामिबियाय् क्वचाःगु आइसीसी विश्व क्रिकेट लिग डिभिजन –२ या कासां एक दिवसीय मान्यता कायेत सफल जूगु खः । नेपाली क्रिकेटं काःगु थ्व आतकया हे दकलय् तःधंगु व महत्वपूर्ण उपलब्धि खः । नेपालं काःगु थ्व उपलब्धिलिसें आः प्यदँ तक आइसीसी अन्तर्गत जुइगु इन्टरकन्टिनेन्टल कप, च्याम्पियन्सप लगायत आपालं महत्वपूर्ण क्रिकेट म्हिते खनीगु जूगु दु ।
इन्टरकन्टिनेन्टल कप एशोसियट राष्ट्रया दथुइ जुइगु दकलय् उच्च तहया कासा खः । थ्व हे कासाय् याःगु प्रदर्शनया आधारय् आइसीसीं एशोसियट राष्ट्रयात टेस्ट मान्यता बीगु वा मबीगु धइगु निर्णय याइ । सन् २०१५ निसें २०१७ तक जूगु इन्टरकन्टिनेन्टल कप कासाय् विजेता जुयाः अफगानिस्तान व उपविजेता जुयाः आयरल्याण्डं टेस्ट म्हितीगु राष्ट्रया मान्यता छुं ई न्ह्यः जक काःगु खः ।
सन् २०१५ निसें ०१७ तक जूगु आइसीसी विश्व क्रिकेट लिग च्यान्पियनशीपय् नेपालं नं ब्वति काःगु खः, तर कासाय् खराब प्रदर्शन याःगु नेपाः न्हय्गूगु थासय् लाःगु जक मखसे रेलिगेशनय् तकं लायेवं डिभिजन–२ लय् घटुवा जूगु खः । विश्वकप छनोटया निंतिं नामिबियाय् जूगु कासापाखें आः वइगु सन् २०२२ तकया निंतिं एक दिवसीय मान्यता कायेवं नेपालं हाकनं आइसीसी विश्व क्रिकेट लिग च्याम्पियनशीपय् ब्वति काये खनीगु जूगु दु ।
# नेपाःयात थप सुविधा
नेपालं काःगु थ्व सफलतालिसें आः नेपालं उच्चस्तरया प्रशिक्षक व कासामिपिंत बीगु सुविधा, थीथी अन्तर्राष्ट्रिय प्रशिक्षण व एक दिवसीय श्रृंखलाया कासा लगायतया सुविधा आइसीसीपाखें काये खनी । सन् २०२२ तकया निंतिं आइसीसीपाखें नेपालं दँय्दसं च्यागू करोड तका ग्वाहालि काये खनीगु क्यानं न्ह्यथंगु दु । थ्व प्यदँ तक नेपालं म्हितीगु कासाकथं हे आइसीसीया वरियताय् कायम जुयाच्वनेगुया नापनापं कासामितय्सं याइगु प्रदर्शनया नं लेखाजोखा तयेगु ज्या जुइ ।
लिसें नेपालं थः स्वयां तःधंगु राष्ट्रलिसे एक दिवसीय कासाया श्रृंखला नं म्हितेगु अवसर प्राप्त जुइ ।सन् २०१३ य् आइसीसी विश्व क्रिकेट लिग डिभिजन –३ या विजेता जुयाः नेपालं विश्वया क्रिकेटप्रेमीतय् ध्यान थःपाखे आकर्षित यायेत सफल जूगु खः । उगु इलय् थः स्वयां सशक्त प्रतिद्वन्द्वी युगान्डायात ५ गू विकेटं बुकाः नेपाः उपाधि विजेता जूगु जक मखसे डिभिजन – २ लय् बढुवा जुइगु नापं सन् २०१४ य् जुइगु आइसीसी विश्वकप छनोटया निंतिं थाय् सुरक्षित याःगु खः ।
छगू लिपा मेगु उत्कृष्ट प्रदर्शन यासें न्ह्याः वनाच्वंगु नेपाली क्रिकेटं सन् २०१४ य् जूगु डिभिजन – ३या क्रिकेटया उपाधि निक्वःखुसी त्याकेत नं सफल जूगु खः । सन् २०१४ य् नेपालं टि–ट्वान्टी विश्वकप क्रिकेट नं म्हितूगु खःसा नेपालं सन् २०१५ निसें ०१७ तक जूगु आइसीसी विश्व क्रिकेट लिग च्याम्पियनशीप म्हितेगु अवसर नं प्राप्त याःगु खः ।
#सफलता त्वःफी फु
वि.सं. २०७३ य् आइसीसीं क्यानयात निलम्बन याःगु खः । क्यान निलम्बनय् लाये धुंकाः उगु इलंनिसें आतक नं अभिभावक विना हे नेपालं तःधंगु क्रिकेट कासाय् सहभागिता क्यना वयाच्वंगु दु । यदि क्यान दुनेया विवाद अन्त्य जुयाः आइसीसीं तयातःगु निलम्बन फुकुवा मजुइगु खःसा नेपालं काःगु थ्व ऐतिहासिक सफलता त्वःफी फु । २०७२ साल मंसिरय् क्यानया तत्कालीन उपाध्यक्ष चतुरबहादुर चन्द, महासचिव अशोकनाथ प्याकुरेल लगायत छगू पक्षं क्यानया अधिवेशन आव्हान यात ।
तर क्यानया हे तत्कालीन अध्यक्ष टंक आङबुहाङया मेगु पक्षं क्वथाय् च्वनाः याःगु निर्णय व पारदर्शी मजूगु धासें तत्काल अधिवेशन दिकेत राष्ट्रिय खेलकुद परिषदय् उजुरी तःगु खः । राखेपया चुनाव दिकेत बिउगु निर्देशनया दथुइ नं क्यानया चन्द व प्याकुरेल पक्षं चांचां चुनाव यात । चुनावं अध्यक्षय् चन्द व महासचिवय् प्याकुरेलयात ल्यल । तर राखेपं गुगुं हालतय् नं उकियात मान्यता बी मफइगु स्पष्ट यात । अनं छुं दिं लिपा हे राखेपं रमेश सिलवालया नेतृत्वय् छगू तदर्थ समिति गठन यात । थनं लिपा क्यानया विवादं उग्ररुप कायेगु नापं चरमोत्र्षय् थ्यन ।
थ्व हे अवस्थाय् २०७३ साल बैशाखय् आइसीसीं क्यानय् सरकारी हस्तक्षेप जूगु व निर्वाचन नं निष्पक्ष मजूगु धासें प्रतिबन्ध तयाबिल । तर आः वयाः आइसीसीं क्यानयात अन्तिम मौका बिउगु दु । आः नं क्यानया विवाद ज्यने मफुत वा ज्यंकेगु मस्वल धाःसा नेपाःया सदस्यता खारेज जुइगु नापं नेपालं काःगु सफलता नं त्वःफी फु । नामिबियाय् जूगु कासाय् नेपाःयात एक दिवसीय क्रिकेटया मान्यता बियाः नेपाः लिहां वःगु नेपाली राष्ट्रिय क्रिकेटया कप्तान पारस खड्कां कासामितय्सं थःगु जिम्मेवारी पूवंकूगु व आः नेपाली क्रिकेटया पदाधिकारी नापं सरोकारवालातय्सं थःगु जिम्मेवारी पूवंकेमाःगु प्रतिक्रिया बिउगु दु ।
LEAVE YOUR COMMENTS