न्हापांगु उपमेयर कप खो खो कासा क्वचाल

किपू (नेपालभाषा टाइम्स) – येँ महानगरपालिका विद्यालयस्तरीय न्हापांगु उपमेयर कप खो खो कासाय् मिजंपाखे शान्ति निकुञ्ज माध्यमिक विद्यालय व मिसापाखे कन्या मन्दिर माध्यमिक विद्यालय न्हाप लाःगु दु ।

थनया कभर्ड हलय् जूगु कासा अन्तर्गत शनिवाः जूगु फाइनलय् मिजंपाखे विश्व निकेतन उच्च माध्यमिक विद्यालय लिउ व भीमसे नगो ला माध्यमिक विद्यालय लियांलिउ लाःगु दु । अथे हे मिसापाखे पद्मकन्या माध्यमिक विद्यालय लिउ व भीमसेनगोला माध्यमिक विद्यालय लियांलिउ लाःगु दु ।

मिसा व मिजंया दथुइ बिस्कं बिस्कं जूगु कासाय् न्हाप, लिउ, लियांलिउलिसें बेस्ट रनर व बेस्ट चेजरयात येँ महानगरपालिकाया कार्यवाहक प्रमुख सुनिता डंगोलं नगद सिरपाःलिसें दसिपौ, पदक लःल्हानादीगु खः । कासाय् न्हापयात न्यय्द्वः, लिउयात नीन्याद्वः, लियांलियात झिद्वः तका दां लःल्हाःगु खः ।

कासाय् मिजंपाखे विश्वनिकेतन उमाविया सूर्य लामिछाने व मिसापाखे पद्मकन्या माविया प्रमिला हस्दा बेस्ट रनर व मिजंपाखे शान्ति निकुञ्ज माविया समिर रौनियार व मिसापाखे कन्या मन्दिर उमाविया रोजिना तामाङ बेस्ट चेजर जुयादीगु खः । बेस्ट रनर व चेजर यात म्हतिं झिद्वः, झिद्वः तका दां लःल्हाःगु खः ।

सिरपाः लःल्हासे कार्यवाहक प्रमुख डंगोलं ब्वँमिपिनिगु शारीरिक, मानसिक व सर्वाङ्गिण विकासया निंतिं येँ महानगरपालिकां शिक्षा, कासाया ख्यलय् लगानी अप्वयेका वयाच्वनागु खँ कनादिल ।

‘हरेक ब्वँमिया थःथःगु हे रुचि दयाच्वनी । बिस्कं बिस्कं विधाया कासाय् रुचि दयाच्वनी । थःपिंसं नं ब्वँमिपिनिगु रुचीकथंया कासाया विकास याये गु जुइ’ , कार्यवाहक प्रमुख डंगोलं धयादिल ।

येँ महानगर खो खो संघया ग्वसालय् जूगु कासाय् मिजंपाखे च्यागू व मिसापाखे झिगू पुचलं ब्वति काःगु खः ।