भ्वतय् मानन्धर सेवा समाज गठन
भ्वत- काभ्रे जिल्लाया भ्वतय् ल्याय्म्हपिं मानन्धरतय्त संगठित यायेगु तातुनाः मानन्धर सेवा समाज गठन याःगु दु । समुदाय दुनेया समस्यात संबोधन यासें समग्र मानन्धर समाजया हे हित, उत्थान व सेवा भावया ल्याखं समाज गठन याःगु खः ।
स्थानीय नवराज मानन्धरया अध्यक्षताय् गठन याःगु न्हय्म्हेसिया ज्यासना पुचलय् रोशन मानन्धर उपाध्यक्ष, विजय मानन्धर सचिव, सुदर्शन मानन्धर कोषाध्यक्षय् च्वनादीगु दुसा दुजलय् विजयलक्ष्मी मानन्धर व डा. रोजी मानन्धर च्वनादीगु दु । लिपांगु इलय् मानन्धर समुदाय तसकं लिउने लानाच्वंगु व आः भ्वतया सकलें मानन्धरत छप्पँ जुयाः न्ह्यः वनेगु निंतिं समाजया गठन यानागु अध्यक्ष मानन्धरं कनादिल ।
भ्वतय् जूगु भेलाय् संस्कृतिया अध्ययेतालिसें शिक्षाविद् ज्ञानकाजी मानन्धर, काभे्र उद्योग वाणिज्य संघया निवर्तमान अध्यक्ष प्रकाश मानन्धर लगायत भ्वतया मानन्धर समुदायया प्रतिष्ठित व्यक्तित्वपिनिगु उपस्थिति दुगु खः ।
लुमंकेबहजू, थ्व स्वयां न्ह्यः थुकथं हे मानन्धर ल्याय्म्हतय्त संगठित यायेगु तातुनाः ख्वपय् भक्तपुर जिल्ला मानन्धर युवा संघ गठन याःगु खः । न्हुछेरत्न मानन्धरया अध्यक्षताय् गठन याःगु नीछम्हेसिया संघय् ख्वप, मध्यपुर थिमि व दधिकोट पकान्डोलया मानन्धर समुदायया बाहुल्यता दुगु त्वाःया प्रतिनिधिपिं दुथ्याः ।
LEAVE YOUR COMMENTS