ने. सं. ११४३ चौलाथ्व पारू -

तोखाय् सांस्कृतिक भिंतुना ब्वज्या

तोखा(नेपालभाषा टाइम्स)- नेपाल संवत् ११४३ न्हूदँया लसताय् येँय् नं उत्तरी भेगय् लाःगु तोखाय् नं भिंतुना सांस्कृतिक ¥यालीलिसें थीथी ज्याझ्वः जुल । तोखा २ वडाया थःनेलाछिं भिंतुना ¥याली शुरु जूगु खःसा र्‍याली न्ह्याके स्वयां न्ह्यः वाङ्मय शताब्दी पुरुष सत्यमोहन जोशीया किपाय् स्वांमाः देछाःगु खः । वयां लिपा सांस्कृतिक व सांगीतिक बाजंनापं झांकी सहितं तोखा नगर परिक्रमा यानाः थःनेलाछिइ थ्यंकाः क्वचायेकूगु खः ।

र्‍याली लिपा नेवाः गुथि तोखाया नायः रमेश नापितया सभापतित्वय् जूगु औपचारिक ज्याझ्वलय् थीथी व्यक्तित्वपिंसं नुगःखँ तयादीगु खःसा तोखा नगरपालिकाया प्रमुख प्रकाश अधिकारीं र्‍यालीइ ब्वति काःगु थीथी संघसंस्थालिसें दाफा भजन खलःयात सुभाय् पौ लःल्हानादीगु खः ।

र्‍यालीइ नेवाः देय् दबूया नायः पवित्र वज्राचार्य, तोखा तलेजु गुथिलिसें तोखा देय्या नायः हेमराज श्रेष्ठ, वडाअध्यक्ष, तोखा सांस्कृतिक संरक्षित क्षेत्रया नायः गणेशमान श्रेष्ठ, नेवाः गुथि तोखाया पदाधिकारीलिसें दुजःपिंनापं तोखाया सामाजिक संस्था, दाफा भजन खलः, आपालं सहकारी संस्थाया प्रतिनिधितय्सं ब्वति काःगु खः ।

थुकथं हे कछलाथ्व पारु कुन्हु न्हूदँ हना खलःया ग्वसालय् नं भिंतुना ¥याली नापं थीथी सांस्कृतिक ज्याझ्वः जूगु दु । तोखाया क्वःनेलाछिइ उगु ज्याझ्वः जूगु खः ।

तोखाय् थुगुसी न्हूदँया लसताय् पिथंगु सांस्कृतिक ¥यालीइ आतकया हे दकलय् अप्वः मनूतय् सहभागिता दुगु ग्वसाः खलकं जानकारी बिउगु दु ।