पाहाँचःह्रे क्वचाल

येँ (नेपालभाषा टाइम्स)- यँेया पाहाँचःह्रे नखःया तःजिक क्वचाल । स्वन्हुयंकं न्ह्याइगु जात्राया झ्वलय् थीथी द्यःपिनि जात्रा जूगु खःसा थाय्थासय् मरःजा नकूगु खः ।

जात्राया झ्वलय् लुँमधि अजिमा, कंग अजिमा, फिब्व अजिमा, तकति अजिमा, लुति अजिमा, थँबहि अजिमा, चन्द्रलखु अजिमा व न्यतमरु अजिमा, न्हाय्कंतला, ओलाछि नर्सिङ द्यःया खः जात्रा जुइ । अथेहे किलाघः गणेद्यः, त्यंगः गणेद्यः, कोहिति गणेद्यःलिसें थीथी त्वाःया गणेद्यःपिनि नं जात्रा जुइ । पाहाँचःह्रेया न्हापांगु न्हि कुन्हु थीथी पीठय् पुजा वनाः भ्वय् नयाः जात्रा हनीसा कन्हय् कुन्हु लुकुमांद्यः व त्वाः गणेद्यः पुज्यानाः मरःजा नकी । येँया कोहिति, भिंद्यःत्वाः, बरननि, वटु, त्यंग, तेबहाः, मखं लगायत थीथी थासय् मरःजा नकेगु याइ । थुकुन्हु हे बहनी तिंख्यलय् वटु, कंग व लुँमधि अजिमाया द्यःखः ल्वाकी । द्यःखः ल्वाकेगु धकाः कंग अजिमायात वटु भद्रकाली व लुमधि अजिमां चाःहिलाः तिंप्वाः हिलेगु याइ ।

थ्वयां कन्हय् कुन्हु द्यःखः जात्रा जुइ । थुकुन्हु थीथी द्यःखः क्वबियाः देय् चाःहिकाः म्ह्याय्मस्तय्थाय् वनाः पुजा फः वनी । थुकुन्हु हे न्हिनय् असनय् द्यः ल्वाकी । असनय् द्यः ल्वाकीबलय् नं वटु भद्रकाली व लुमधि भद्रकालीं कंग अजिमायात चाःहिलाः तिंप्वाः हिलेगु याइ । थुबलय् असंया छेँय् छेँय् नं चतांमरि ह्वलेगु याइ । जात्रा क्वचायेकाः सकलें द्यःपिंत थःथःगु द्यःछेँय् सिँफं लुयाः दुकायेवं जात्रा क्वचाइ ।