नेवाः एकता दिवसया निंतिं सहलह

येँ  (नेपालभाषा टाइम्स) – थ्व हे वइगु पोहेलाथ्व नवमिकुन्हु नेवाः एकता दिवस न्यायेकेगु ल्याखं तयारी न्ह्याःगु दु। थुगुसी झिंछक्वःखुसी नेवाः एकता दिवस न्यायेकेत्यंगु खः ।

नेवाः स्वायत्त राज्य मंकाः संघर्ष समितिया ग्वसालय् थनिं झिंछदँ न्ह्यः स्वनिगःन्यंकंया नेवाःत दशरथ रंगशालाय् मुनाः नेवाः स्वायत्त राज्य घोषणा याःगु दिं पोहेलाथ्व नवमिकुन्हु दँय्दसं नेवाः एकता दिवस न्यायेकेगु याना वयाच्वंगु दु । थुगुसी नेवाः एकता दिवस संघीय लोकतान्त्रिक गणतन्त्र वयेधुंकाः निर्वाचित जनप्रतिनिधि संस्था संघीय संसद (प्रतिनिधिसभा) विघटन व वयां लिपा विकास जूगु राजनीतिक घटनाक्रमयात विषय केन्द्रीत यानाः नेवाः एकता दिवस हनेगुकथं तयारी जुयाच्वंगु दु ।

थुगुसी नेवाः एकता दिवस ख्वनाया खुद्वलय् यायेत्यंगु दु । नेवाः एकता दिवसया संयोजन यानाच्वंगु नेवाः देय् दबूया नायः नरेश ताम्राकारं ‘नेपालभाषा टाइम्स’ यात बियादीगु जानकारीकथं थुगुसी स्वनिगःया नेवाःतय्त विस्थापित यायेगु ल्याखं हयाच्वंगु थीथी योजनाया विरोधय् केन्द्रीत जुयाः दिवस न्यायेगु तयारी जुयाच्वंगु दु ।

वय्कलं कनादीकथं स्वनिगःया नेवाःतय्त विस्थापित यायेगु ल्याखं राज्यं हयाच्वंगु गुथि विधेयक, ख्वनाया फास्ट ट्र्याक, सतक विस्तार, ल्हुतिइ छेँ थुंगु घटना, थँबहीया कमलपुखुलिइ दयेकूगु छाँयादेवी कम्प्लेक्स लगायत आदिवासी जनजाति विरुद्ध हयाच्वंगु योजनायात केन्द्रीकृत यानाः दिवस हनेत्यंगु खः । नेवाः एकता दिवस हनेगु निंतिं तयारीकथं आः नकतिनि जक इतुंबहालय् छगू मुँज्या नं च्वंगु खः । थुगुसी नेवाः एकता दिवस देय् दबूया संयोजनय् नेवाःतय्त विस्थापित यायेगु ल्याखं हयाच्वंगु थीथी योजनाया विरोधय् कुहां वयाच्वंगु संघर्ष समिति व अभियानया सहकार्यय् न्यायेकेत्यंगु दु ।

सम्बन्धित बुखँ

LEAVE YOUR COMMENTS