नेवाः खलः, पुचःयात ग्वाहालि यायेत ग्लोबल नेवाः नेटवर्क
येँ – नेपालभाषा, साहित्य, संस्कृति व नेवाः जातिया उत्थानया निंतिं सक्रिय भाषिक खलः, पुचः नापं जातीय संघसंस्थायात आर्थिक ग्वाहालि यायेगु ल्याखं ‘ग्लोबल नेवाः नेटवर्क’ नांया छगू संगठन नीस्वंगु दु । नेवाः ख्यःया थीथी व्यक्तित्वपिनिगु छगू भेलां भाजु सुनिलकुमार शाक्यया संयोजकत्वय् उगु नेटवर्क गठन याःगु खः ।
नेटवर्कया संयोजक शाक्यं विश्वया थीथी देशय् च्वनाच्वंपिं नेवाःत नापं नेपालय् भाषा ख्यःयात ग्वाहालि यायेगु इच्छा दुपिंपाखें आर्थिक ग्वाहालि म्हयाः छगू कोष नीस्वनाः उगु कोषया ब्याजपाखें भाषिक खलः, पुचः नापं जातीत संगठनयात आर्थिक ग्वाहालि उपलब्ध याकेगु जुइ धयादिल ।
नेवाः खलः, पुचःयात आर्थिक रुपं तीबः बीत गठन जूगु नेटवर्कयात कयाः भाषासेवी लक्ष्मीदास मानन्धर, नेवाः देय् दबूया नायः नरेश ताम्राकार, शाक्य समाजया नायः प्रा. सुवर्ण शाक्य, नेवाः स्यनामि दबूया मदनसेन वज्राचार्य, भाषासेवी पवित्र वज्राचार्य लगायतं नेटवर्कया उद्देश्य व ज्या सुथां लायेमा धकाः भिंतुना देछानादीगु खः ।
नेटवर्कया गठन व उकिया उद्देश्य बारे जानकारी बीगु ल्याखं गठन जूगु भेलाय् गणेशराम लाछि, अनाररत्न वज्राचार्य, गौतम मानन्धर, दीपक तुलाधर, सागरमान वज्राचार्य, सुरजवीर वज्राचार्य, सुरेन्द्र तुलाधर लगायतपिनिगु उपस्थिति दुगु खः ।
डा. ज्योति तुलाधर (पोर्चुगल) व डा. केशवलाल महर्जन (जापान) संरक्षककथं च्वनादीगु शाक्यया संयोजकत्वय् नीस्वंगु नेटवर्कय् सरोजरत्न शाक्य (न्यूयोर्क, अमेरिका), अञ्जली ताम्राकार (जर्मनी), राधिका सुवाल (युएस बोस्निया), पुष्करलाल जोशी (स्पेन) आशाजीत अवाले (थाइल्याण्ड), संजय शाक्य (कोलम्बो, श्रीलंका) दुजःकथं च्वनादीगु दु । ज्याझ्वलय् नेटवर्क न्ह्याकेगु निंतिं व्यापक सहलह जूगु खः ।
LEAVE YOUR COMMENTS