ने. सं. ११४४ कछलागा षष्ठी -

प्वाथय् गर्मी जूसा थ्व उपाय नालादिसँ

प्वाथय् गर्मी जुइगु न्ह्याम्हेसितं जुयाच्वनीगु समस्या खः । मसला यक्व दुगु, चटपट नसाज्वलं, जंकफुड वा तसकं पालुगु नलकि थज्याःगु समस्या वयाच्वनी । थौंकन्हय्या अनियमित जीवनशैली व नयेत्वनेगु बांमलाःगु शैलीं यानाः नं थज्याःगु समस्या जुयाच्वनी । प्वाथय् गर्मी जुलकि प्वाः हिइया वइ । प्वाथय् गर्मी जुयाः
प्वाः हिइया वल धाःसा छेँय् हे थ्व
वासः दयेकाः नयेफु, गुकिं प्वाः हिइगु याउँसे च्वनी ।
– छगः पाय्नय् इमू भचा सियादिसँ, अले नच्चुक निनादिसँ । थुकी बेची भचा ल्वाकछ्यानादिसँ । नसा नयेधुंकाः थ्व मिश्रण लुमुलुमु धाःगु लखय् छगू चम्चा ल्वाकछ्यानाः त्वनेगु यानाबिल धाःसा प्वाःया गर्मी व एसिडिटी मदयावनी । इमूलय् दइगु थायमल व बेचीइ दइगु अल्केलाइड्सं एसिडिटीयात तापाका–
छ्वइ ।
– छगू कप क्वाःलखय् छगू चम्चा तग्वःगु जी (सोंफ) ल्वाकछ्यानादिसँ, अले चछि थथे यानाः फ्वयातयादिसँ । सुथय् दनेवं लः छाने यानाः कयादिसँ, उकी छगू चम्चा कस्ती ल्वाकछ्यानाः त्वनादिसँ । थ्व मिश्रण न्हि स्वक्वः त्वनेगु यात धाःसा नं प्वाःया गर्मी व एसिडिटी मदयावनी ।
– पालुया तिं नं प्वाःया गर्मी व प्वाः हिइगु लंकेत ग्वाहालि याइ । कागतिया रस व कस्तीइ पालुया ति ल्वाकछ्यानाः त्वनाबिल धाःसा प्वाः हिइगु लनावनी । थुकिया लिसें पालुया तिइ एञिन्टब्याक्टेरियल गुण नं दइ । थुकिं प्वाथय् दायाच्वंपिं हानिकारक ब्याक्टेरिया नं च्वत्तुक छ्वयाबी ।
– क्याल्सियम, फस्फोरस व भिटामिन सी दुगु गोलभ्यारां म्हय् दुने च्वंगु किटाणुतय्त पिने छ्वयेत ग्वाहालि याइ । प्वाथय् गर्मी जुल धाःसा गोलभ्यारा नयेगु नं फाइदा हे खः । गोलभ्यारा न्हियान्हिथं नयेगु यात धाःसा प्वाः हिइगु व एसिडिटीपाखें राहत बी । गोलभ्यारां म्हय् क्षारया मात्रा अप्वयेकाबी । अथेहे सन्त्रासी दइगु फ्रक्टोज, डेक्स्ट्रोज, खनिज व भिटामिनं म्हय् उर्जा बी । सन्त्रासी नियमित नयेगु यात धाःसां नं प्वाः हिइगु व एसिडिटीपाखें राहत जुइ ।