मिजंतय्सं नं यायेमाः सँया बिचाः

सँ बांलात कि झीगु व्यक्तित्व नं थहां वइ । बांलाःगु, बल्लाःगु व ख्वातुगु सँ तये मिसातय् जक मखु, मिजंतय् नं उतिकं यइ । तर भुइभाय्दंगु, कुलिकुलिचिंगु सँ, सँ हाइगु, सँ ताःहाकः मजुइगु व चिकं कंगु सँ, मिजंतय्त जुइगु सँ सम्बन्धि छुं छुं समस्या खः । मिसातय्सं थें हे मिजंतय्सं नं थःपिनिगु सँ बांलाका तयेत उकिया बिचाः यानाच्वनेगु आवश्यक जुइ । थुकिया निंतिं छुं छुं घरेलु उपाय नं झीसं नालाकायेफु। सँयात हाकुसे बांलाकाः चमक नं दयेकातयेत छ्यलेमाःगु छुं छुं उपाय थन बियागु दु –

आयल मसाज

आयल मसाजं सँयात माक्व पोषण दइ । थ्व बाहेक सँया गम्भीर क्षति नं थुकिं पनी । सँया सुसाःकुसाः यायेत मर्स्याबरां चिकं (Almond Oil) वा नैंक्याः चिकनं छवाःया निक्वः छ्यनय् मालिस यायेगु बांलाइ ।

धौ व मलय्

छ्यनय् तुँचा फी फी थानाच्वंगुयात मदयेकाछ्वयेत थ्व छगू बांलाःगु उपाय खः । थुकिया निंतिं धौ स्वंगू चम्चा कयादिसँ, थुकी मलय्चुं भचा ल्वाकछ्यानाः मिश्रण दयेकादिसँ । थ्व मिश्रण बांलाक संकाः छ्यनय् ब्वब्वस्यानादिसँ । घौछि त्वःतादिसँ । वयां लिपा श्याम्पुं म्वःल्हुयादिसँ ।

कुनू

सँयात बल्लाकेगु व चमक दयेकेगु इच्छा याइपिं मिजंतय्सं कुनूया लाः (एलोभेरा जेल) कयाः छ्यनय् मसाज यायेमाः । छवाःया निक्वः थुकथं मसाज यायेगु यानाच्वन धाःसा सँ हाइमखु, सँ सुख्खा जुइमखु, अले छ्यनय् छुं इन्फेक्सन जुइमखु।

नीहः 

नीहः छ्यानाः पेस्ट दयेकाः छ्यनय् पायेगु यात धाःसां नं सँ हाइगु समस्या जुइमखु। थ्व पेस्टयात
अझ प्रभावकारी दयेकेत थुकी कस्ति व ओलिभ आयल भचा भचा ल्वाकछ्याःसां जिउ ।

ख्यें

सँया सुसाःकुसाः यायेत प्रोटिन ट्रीटमेन्ट एकदम आवश्यक जुइ । यदि छिं ख्वातुगु व बल्लाःगु सँया इच्छा यानाच्वनादियागु दुसा छवाःया स्वक्वः प्यक्वः थःगु सँय् प्रोटिन ट्रीटमेन्ट यायेगु कुतः यायेमाः । सँय् प्रोटीन ट्रीटमेन्ट यायेत ख्यें छगः बांलाक फिटे यानाः थःगु प्याःगु सँय् पानादिसँ, अले १५ मिनेट लिपा लुमुलुमु धाःगु लखं सँ चायाछ्वयादिसँ ।

मी

मी निगू निसें स्वंगू चम्चा लखय् तयाः च्याघौ निसें झिघौ तक फ्वयातयादिसँ । अनंलि थुकिया पेस्ट दयेकाः थःगु सँय् पानादिसँ । थ्व मिश्रणं सँ हाइगुयात पनेगुया लिसें सँया विकासयात नं प्रोत्साहित याइ । लिसें थुकिं तुँचा दायाच्वंगु दुसा व नं मदयेकाछ्वइ ।

सन्तरासि

यदि छितः तुँचा दायाच्वंगु दु अथवा सँ चिकं कंगु जुयाच्वंगु दुसा सन्तरासिया रसं छितःयक्व ज्या बीफु। थुकिया निंतिं सतरासि प्वलाः सन्तरासि म्येया ख्वलाः लिकयाः ला जक न्हायादिसँ । थुकथं तयार यानागु प्याक थःगु सँय् छवाःया छक्वः तयादिसँ ।

समाः नेवाः

सम्बन्धित बुखँ

LEAVE YOUR COMMENTS