मिसातय् थीमजिउ दितकि

मिसातय् जब थीमजिउ दी, व अवस्थायात रजोनिवृत्त धाइ । मिसातय् जब थथे प्राकृतिक रूपं थीमजिउ दी वा दीगु अवस्था वइ, व ई थ्यनकि, थ्यनीथें च्वनकि इमिगु म्हय् हार्मोनया मात्राय् हिउपाः वइगु जुयाः इमिगु म्हय् अस्वाभाविक रूपं हिउपाः खने दयावइ । थीथी कथंया हिउपाः खने दयावइ । अले अज्याःगु हिउपाःया वासः व निदानया लागिं डाक्टरतय्सं यक्व यक्व ध्यबा खर्च याकाच्वनी ।

तर डाक्टरतय्सं अज्याःगु हिउपाः व उसाँय् थीमजिउ दिनाः व दीत्यनाः प्राकृतिक रूपं मिस्तय्त म्हय् खने दयावइगु ल्वय् वा हिउपाः खः धकाः बिचाः याकी मखु। थुखेपाखे विचाः यानाः वासः याकेगु लुमंकी मखु। हानं स्वयं मिसातय्सं थःगु थीमत्यः दित धकाः कनी नं मखु। गुकिं यानाः म्वाःमदुगु वासः यानाः ध्यबा फुकाच्वनी । अथे जुयाः थज्याःगु अवस्थाय् वइपिंत डाक्टरतय्सं इमिगु रजोनिवृत्तया बारे न्यनेकने यानाः जक वासः यायेमाः । ल्वगितय्सं नं
कनेमाः ।

मिसातय्के हर्मोनया मात्रा म्हो जुयाः वनकि लय्लय् डिम्बासयं डिम्ब पाके जुयाः प्वाथय् मवलकि थीमजिउ दी । खास यानाः मिसातय् पीन्यादँय् थीमजिउ दी । अपवादया रूपय् पीदँनिसें न्यय्न्यादँया दुने थीमजिउ दीफु। थ्व जुलप्राकृतिक रजनोवृत्ति । गुलिखय् उसाँय् मदयाः, अपरेशन यानाः मचाछेँ हे लिकयाछ्वलकि थीमजिउ दी । थ्व अवस्थायात सल्यक्रियात्मक रजोनिवृत्ति धाइ । अथेंतुं गुल्सं गुल्सं वासः यानाः गथेकि केमयोथेरापी, रेडियोथेरापी, क्यान्सरया वासः आदि प्रयोग जुल कि थीमजिउ जुइगु प्रभावित जुइ । दी ।

मिसातय् थीमजिउ दी न्ह्यः इमिगु शरीरय् यक्व यक्व हिउपाः वइ । अज्याःगु हिउपाः धाःसा थीमजिउ जूगु दक्कसिवें लिपा तकं खने दया वयाच्वनी । अज्याःगु हिउपाः सामान्यतया सकसितं खनेदइगु लक्षण व चिन्हत खः । म्ह चासुया वइगु, म्हय् कै नं वइ, छ्यंगूया ल्वय् मदुसां म्ह चासुइ । गुल्सं गुल्सं मिसातय्सं बांबांमलाःगु अश्लिल वा फोहरी बोली बचन तकं ल्हाये यः । तं अप्वः पिकाये यः । ख्वालय् तसकं क्वाःगु वा पूगु अनुभव जुइ । चित चित चःति वयाच्वनी । भतिचा भतिचा झुम्म च्वंथें जुइ । न्ह्यः वयाच्वं थें जुइ । नुगःचु धुकधुक मिंथें च्वनी । गुब्सं गुब्सं न्ह्यः बांलाक वइमखु। वःसां न्ह्यः स्यनी । चान्हय् चान्हय् दने मालाच्वनी । न्ह्यः वलकि दने मालकि चुलुचुलु पिसाब याये मालाच्वनी ।

थ्व अवस्थाय् यौनसम्पर्कय् नं समस्या वइ । योनी गनीगु, सुख्खा जुइगु का®णं यानाः यौनसम्पर्क पीडादायक जुइ । योनीं योनीरस उत्पादन मजुइगु जुयाः यौनसम्पर्कय् घाःपाः जुइफु। कारणवस मिजंतय् यौनसम्पर्कया इच्छा दइमखु। मिजंत तापाना वनेफु। यौन सम्पर्क म्हो जुयावनी । तर निम्हेसिनं नं कारणयात सिइकाः थुइकाः माःबलय् माःथाय् माः कथं चिकं प्रयोग यानाः नं यौनसम्पर्क सहज यायेजिउ । गुकिं यानाः मिसातय् यौनइच्छा अझ अप्वः जुयावइ । आः मचा दइमखुत, नियोजनया वासः नये माली मखुत धकाः निम्हेसियां यौनइच्छा अप्वः दयावइ । यौन चिकंया बारे न्यनेगु वा मदुसा छेँय्या चिकं प्रयोग यानाःसां जिउ । ई माःबलय् धाःबलय् प्राप्त जुइगु जुयाः प्रयोगय् सनाच्वने माली नं मखु। ध्यबा फुइ नं मखु। हानं प्रयोग याये नं अःपुइ ।

अथेंतुं छ्यंगू गनावनी । सालुयावनी । कत्ला कत्ला खने दयावइ । ख्वाःया छ्यंगू चाउरी परे जुयावनी । ख्वालय् अप्वः सँ बुयावइ । सँयागु चमक तनावनी । सँ हायावइ । नये त्वनेगुली बिचाः मयात धाःसा ल्ह्वनाः वइ । प्यंपा तग्वः जुया वइ । लापाँय् छवासुयावइ । साःसाः स्यानावइ । ल्ह्वनाः वःलिसें शारीरिक श्रम म्हो जुयावःलिसें चिनिया ल्वय्, प्रेशरया ल्वय्, मुटुया ल्वय् खने दयावइ । थाइराइडस्या ल्वय् क्यान्सरया ल्वय् खने दया वयेफु। क्वँय् ज्यलावनी । सामान्य चोटपटकं नं क्वँय् त्वःधुले फु। त्वःधुलकि हानं स्वाइ नं मखु। म्हय् हार्मोनया मात्रा म्हो जूवनीगु जुयाः क्वँय् सालुयावनी । कमजोर जुयावनी । क्वँय्या ल्वय् अस्तियोपोराेसिस जुइ । मिसा हर्मोन इस्त्रोजन म्हो जुइगु कारणं मिसातय्के थ्व अवस्था वइगु खः ।

अय्जुयाः इस्त्रोजन हर्मोन धइगु नसात्वँसा गथेकि मुस्या व मुस्याजन्य पदार्थ फसिपु, काउलि, चना, राजमा, सिमि, च्याऊ, सुन्तला, ख्येँ, ब्रकाउली, पलःचाया नाप नापं ख्वःसिं, बरां, आदि नयेगु यायेमाः । अथेतुं क्वय्या लागिं क्याल्सियम भिटमिन डी युक्त नसात्वँसा गथेकि धौ, दुरु, व दूधजन्य पदार्थ न्या न्याचिकं, समुद्री नसा त्वँसा नयेगु यायेमाः । थुकथं नयेगु त्वनेगु यानाः नं सामान्य उपचार यानाः नं मजिल धाःसा स्त्री राेग विशेषज्ञ नापं सहलह यानाः हार्मोन प्रतिस्थापन वासः नं यायेमाः ।