जनता अवाक थौं

नर्मदेश्वर प्रधान

विश्व स्वास्थ्य संगठनया नायलं विश्वयात हे कडा चेतावनी बिसें धाइ । कोरोनाया प्रकोपं विश्व खतरामुक्त जूगु मदुनि । न्हापांगु, निगूगु कोरोनाया लहर लिपा स्वंगूगु लहर न्ह्याइगु सम्भावना उतिकं दनि । न्हापांगु व निगूगु लहरया कोरोना संक्रमणं सम्पूर्ण विश्व, मानवजातिं अकल्पनीय क्षति फयेमाल ।

खतुं खोपया कारणं कोरोनापाखें सुरक्षित जुइत निश्चय नं विश्वयात राहतया अनुभूति बिल । तर विश्वया सम्पूर्ण देशं खोपया सुविधा उलि द्रुतगतिं प्राप्त याये फइगु स्थिति मदु ।

कोरोनाया स्वंगूगु लहर वइगु सम्भावनां विश्वयात गुगु गम्भिर स्थितिइ थ्यंकीगु खः ? थ्व नं उतिकं त्रास, भय व चिउताःया विषय जुइ । विश्व स्वास्थ्य संगठनया नायलं समस्त विश्वयात हे सतर्क यासें धाइ विश्व कोरोनाया सम्भावित खतरां मुक्त जूगु मदुनि । थुकिया निंतिं विश्वया हरेक देशं वइगु खतरालिसे सामना यायेत इलय् हे तयारी याना तयेमाः ।

अथे हे खोपया कारणं कोरोना क्वलात, सामान्य जीवन हंसां जिल धकाः निष्कर्षय् वये फइगु स्थिति मजूनि । अझ नं सम्भावित स्वंगूगु लहरयात ध्यानय् तयाः कोरोनापाखें सुरक्षित जुइगु नियम, अनुशासन पालना याना हे च्वनेमाः । मती लूकथं जुइ फइगु अवस्था मवःनि ।
विश्व स्वास्थ्य संगठन विश्वयात हे स्वास्थ्यया विषयय् मार्गनिर्देश याइगु आधिकारिक निकाय खः । थ्वं बीगु चेतावनीयात अविश्वास याये फइगु खँ जुइमखु । थ्व क्यनीगु सतर्कताप्रति जनचेतना थनेमाःगु अतिकं आवश्यक जुइ । सरकारं नं विश्व स्वास्थ्य संगठनया चेतावनी अनुरुप इलय् हे वये फइगु खतरालिसे समाना याये फइगु क्षमताया तयारी यायेमाः ।

कोरोनाया न्हू न्हूगु भेरियन्ट खनेदत । बेलायती, भारतीय, नेपाली थीथीकथंया कोरोनाया न्हू न्हूगु ताजित खने दया वःगु दु । विशेषज्ञतय् धापू दु । थ्व न्हू न्हूगु भेरियन्टतसें न्हू न्हूगु हे समस्या हइगु खः ला ?

थौंकन्हय् बिउगु खोपं गुगुं नं भेरियन्टतय्त नं दमन याये फइ ला कि फइमखु ? आम जनतायात चिन्ता जुयाबी । विज्ञतय्सं धाइ कोरोनां थःगु रुप, स्वभाव हिइका च्वनी । थुकियात ‘म्युटेसन’ धाइ । थ्व हे रुपान्तरण जुइगु स्वभावं यानाः कोरोनाया भाइरसतसें न्हू न्हूगु रुप कयाच्वनी । न्हू न्हूगु भेरियन्टत प्रकट जुयाच्वनी ।

थौंया विश्वयात तःधंगु चिन्ता, भय, त्रास विश्वयात हाकनं हाकनं वइगु कोरोनाया चरणत गबलय् शान्त जुइगु खः ? कोरोनाया प्रकोपं थौं विश्वयात हे अशान्त याना बिउगु दु । झीगु देशय् नं दँ दँ हे दत राजनीतिक कोरोनां दुःख बियाच्वंगु । राजनीतिक कोरोना भाइरसतय् कारणं नेपाली जनताया जीवन हे अस्तव्यस्त, हताहत जुयाबी । कष्ट, पीडाय् लाइ ।

छखेर कोरोना ल्वय्या आक्रमण, मेखेर राजनीतिक कोरोनाया पीडा । नेपाली जनता निगू धार दुगु खुकुरीया प्रहारय् लाइ । इमिगु जीवन छिया छिया जुइ । देय्या राजनीतिक कोरोनाय् नं थीथी चरणत न्ह्याइ । न्हापांगु चरण फुत कि देय्या राजनीतिक स्वास्थ्यय् सुधार वइला ? देशं सुख शान्ति काये फइला ? गुलि मनूतय्सं आशा याइ । तर राजनीतिक कोरोनां निरन्तरता कया यनी । निगूगु राजनीतिक कोरोनाया भेरियन्टत खनेदइ । कोरोना ला कोरोना हे खः थ्व । जुइ । खालि रुप फेरे यानाः लूगु कोरोना राजनीतिक कोरोनां देशय् संक्रमित जुइ ।

देशं थौं गुगुं नं राजनीतिक परिवर्तनयात अस्वस्थतां स्वस्थताय् थ्यंकीगु सकारात्मक रुपान्तर खंकेगु स्थिति मदु । थुकियात कोरोनाया छगू चरणं मेगु चरणय् न्ह्याःगु क्रियाकथं जक खंकेफु । खंकेमाः ।

थ्व हे तालं देय्या स्वास्थ्य सामान्य, शान्त स्थितिइ वये फइगु कल्पनातकं याये फइमखु । देशय् हाकनं हाकनं न्हू न्हूगु राजनीतिक कोरोनाया भासय् लाःवनी । जनतां झन्झन् दुःख सी । दुर्दिनत फये माली । आः । न्हूगु सरकार वल । तर । आम जनता गुलि उत्साहित ? गुलि विश्वस्त ? आः म्हिगःया दुर्दिन अन्त जुइ, जनतां सुख, शान्ति प्राप्त याइ ! जनतां ला म्हिगःया कोरोनाया चरणया थासय् मेगु कोरोनाया कहरया चरण वःगु खः । छुं शुभ दिनया आशा यानाच्वंगु मदु । थौं राजनीतिक वृत्तया निशाना विविध भेरियन्टया नेतातय् शक्ति प्राप्ति खः ।

जनता, देय्या उन्नति विकासया एजेन्डाया विषयय् इमित मतलब मदु । राजनीति धइगु थौं कथित नेतातय्सं मात्र कोटपर्वया रणभूमि खंकाच्वंगु दु । उद्देश्य शक्ति । विधि काटमार । षडयन्त्र । कथित नेतात ।

वं वयात क्वःथली । वं वयात । राजनीतिक मल्लयुद्ध । थीथी नेतातय् झोलेतय्सं थःथः पक्षय् सिटि पुइ । लापा थानाच्वनी । थ्व हे पहलं राजनीतिक उतारचढाव जुयाच्वनी । तर गुगुं नं कथित राजनीतिक पक्षया विजयोत्सव छाय् देय् व जनताया निंतिं मात्र खतराया घन्टी जुइ ? छाय् सम्भावित न्हूगु राजनीतिक कोरोनाया चरणया पूर्व संकेट जुइ ?जनता अवाक थौं !