प्रियंकाया ब्वहलय् भारतीय कंग्रेस

थ्व दँ भारतय् न्हूम्ह प्रधानमन्त्री ल्ययेगु दँ खः । भारतय् याकनं हे लोकसभा चुनाव जुइत्यंगु दु । अले थुगुसी नं न्ह्याबलें थें सत्ताया निंतिं कंग्रेस व भारतीय जनता पार्टी (भाजपा) दथुइ हे प्रतिस्पर्धा जुइगु जुइ । थ्वयां न्ह्यवया चुनावय् भाजपां बांलाःगु लिच्वः हयेवं नरेन्द्र मोदी प्रधानमन्त्री जुयाच्वंगु दु ।

व इलय् मोदी लहर हे वयाच्वंगु खः ।मोदीया चामत्कारीक भाषण व मोदी लहरं वइगु चुनावय् नं मोदीं भाजपायात याउँक हे विजयया लँपुइ न्ह्याकीगु चर्चा जुयाच्वंगु खः । तर आः वयाः स्थिति अज्याःगु मजुइधुंकूगु दु । उकिसनं मोदीयात टक्कर बीगु निंतिं कंग्रेसं जोडतोड तयारी याःगु दुसा चुनावी रणनीतिइ हिउपाः हःगु दु ।

थ्व हे हिउपाःया झ्वलय् मोदीयात टक्कर बिइगु निंतिं प्रियंका गान्धी सक्रिय राजनीतिइ कुहां वःगु दु । प्रियंकायात कंग्रेसं महासचिव दयेकाः मोदीया संसदीय चुनाव क्षेत्र दुथ्यानाच्वंगु उत्तर प्रदेशया पूर्वी लागा स्वयेगु जिम्मेवारी बिउगु दु ।

सु खः प्रियंका
स्वतन्त्र भारतया न्हापांम्ह प्रधानमन्त्री जवाहरलाल नेहरूया सन्तान खः – प्रियंका । प्रधानमन्त्री जुयाच्वंगु इलय् हे हत्या जूपिं इन्दिरा गान्धीया छ्य व राजीव गान्धीया म्ह्याय् । अले थौंकन्हय् कंग्रेसया नेतृत्व यानाच्वंम्ह राहुल गान्धीया तता, सोनिया गान्धीया म्ह्याय् ।

छाय् प्रियंका
लोकसभाया चुनाव न्ह्यःने वयेवं प्रियंका सक्रिय राजनीतिइ कुुहां वःगु खः । कंग्रेसयात हाँके यानाच्वंम्ह वया दाजु राहुल गान्धी प्रियंकायात कंग्रेस महासचिव दयेकाः राजनीति क्वत हःगु दु । खय्त ला प्रियंका न्हापा नं राजनीतिं तापाक च्वनाच्वंम्ह मखु । चुनावया इलय् सोनिया गान्धीया चुनाव प्रचारय् कमान्डर थें हे जुयाः खटे जुया वयाच्वंम्ह खः ।

थुकिया लिसें दुनें दुनें पार्टीया हरेक ज्याय् मिखा ब्वया वयाच्वंसां प्रियंका छुं नं पद कयाः सक्रिय राजनीतिइ धाःसा कुहां मवः । वया मां सोनिया गान्धीं नं प्रियंका थःत गुबलय् इच्छा जुइ उबलय् हे जक राजनीतिइ कुहां वइ धया वयाच्वंगु खः । आः प्रियंका सक्रिय राजनीतिइ वःगु धइगु जुइत्यंगु लोकसभा चुनाव कंग्रेसया ल्हातय् लाकेगु ताः तयाः हे खः ।

भारतीय राजनीतिक नक्साय् उत्तर प्रदेशया तःधंगु थाय् दु । भारतया हे तःधंगु राज्य मध्ये छगू लानाच्वंगु उत्तर प्रदेशय् जक लोकसभाया ८० सिट दु । कंगे्रसया निंतिं थ्व राज्य छाय् नं महत्वपूर्ण धाःसा थ्व राज्यपाखें पार्टीया प्रमुख नेता सोनिया गान्धी, राहुल गान्धीं संसदीय चुनाव ल्वाना वयाच्वंगु दु ।

उकिया लिसें प्रधानमन्त्री मोदी नं थ्व राज्यपाखें संसदय् प्रतिनिधित्व याना वयाच्वंगु दु । तर थ्व राज्यय् कंग्रेस कमजोर दु । उकिसनं समाजवादी पार्टी व बहुजन समाज पार्टीया गठबन्धनं कंग्रेसयात झन् मछिंकाच्वंगु स्थिति दु । थज्याःगु अवस्थाय् कंग्रेसं आः प्रियंकायात मैदानय् क्वत हःगु तप्यंक मोदीयात टक्कर बीत नं खः ।

प्रियंका नेहरू–गान्धी परिवारया छम्ह अज्याःम्ह दुजः खः, गुम्हेसित कयाः भारतीयतय्त न्ह्याब्लें कौतुहलता दया हे च्वन । नेहरू–गान्धी परिवारया आः दुपिं दुजःपिं मध्ये सुनां नं भारतीय जनताय् अज्याःगु असर लाके मफु, गुलि प्रियंकां लाकेफु । थुकिया मू कारण प्रियंका जनताय् याकनं भिजे जुइफु, अले थ्व स्वयां नं मेगु महत्वपूर्ण कारण प्रियंका वया अजि इन्दिरा गान्धी थें हे च्वं ।

इन्दिरां थें ब्वाइज कट सँ तयातइम्ह प्रियंकाया भाषण नं अजिम्हेसिया थें हे ओजपूर्ण जू । भारतय् अझ नं गान्धी परिवार, इन्दिरा गान्धी धालकि उलि हे सम्मान दु । उकिं प्रियंकां आःया चुनावय् कंग्रेसया निंतिं महत्वपूर्ण भूमिका म्हितीगु सकसियां आश दु । उत्तर प्रदेशय् कंग्रेसयात हाकनं पुलांगु हे अवस्थाय् लित हयेगु जिम्मा आः प्रियंकाया ब्वहलय् दु ।

प्रियंकाया चुनौति
जनसंख्याया ल्याखय् उत्तर प्रदेशय् बुनकर, दलित–लिउने लानाच्वंपिं वर्ग, मुस्मां, ब्राह्मणतय् ल्याः यक्व दु । न्हापा कंग्रेसयात मत बीपिं नं मुस्मां, दलित, ब्राह्मणत हे खः । तर थौंकन्हय् मुस्मांत समाजवादीपाखे, दलित व लिउने लानाच्वंपिं वर्ग बहुजन समाज पार्टीपाखे व ब्राह्मणत भाजपापाखे लिना वनेधुंकूगु दु ।

थज्याःगु अवस्थाय् थुमित हाकनं कंग्रेसय् लित हयेगु प्रियंकाया तःधंगु चुनौति जुइ । नेहरू गान्धी परिवारप्रति थनया जनताया अझ नं आस्था दनिगु कारणं इन्दिरा गान्धी थें च्वंम्ह प्रियंकां जनताय् असर लाकी धयागु कंग्रेसया स्थानीय नेतातय् आशा दु । थुकिया लिसें प्रियंकां फयेमालीगु मेगु छगू चुनौति धयागु वया भाःत रोवर्ट वाड्रायात कयाः जुयाच्वंगु आर्थिक घोटालाया मामिला ।

चुनावया इलय् विपक्षीतय्सं थ्व मुद्दा ल्ह्वनीगु पक्का हे जुइ । थज्याःगु चुनौती पार यानाः प्रियंकायात थः दाजुयात प्रधानमन्त्रीया कुर्सी तक यंकेगु जिम्मेवारी वःगु दु, उकी गुलि तक सफल जुइ छुं ई लिपा हे सीदइ जुइ । प्रियंकाया हे सफलता–असफलतां हे भारतीय राजनीतिइ नेहरू गान्धी परिवारया भविष्यया नं फैसला याइगु जुइ ।