भिंगु इच्छा व मभिंगु इच्छा

इच्छा सकसिकें ब्वलनी । काय म्ह्याय्या इच्छा । छेँबुँया इच्छा । साःभिं नयेगु इच्छा । बांलाक पुनेगु इच्छा । विदेश वनेगु इच्छा । रुपरंंगया इच्छा । गाडी, प्लेन गयेगु इच्छा । डाक्टर जुइगु इच्छा । सकलें प्राणीयाके थुकथं इच्छा दइ । इच्छा नं छम्हनापं मेम्हसिया पाइ । गुलिसियां कतःयात घात यायेगु इच्छा तकं याइ । इच्छा ब्वलनीगु नं ई व परिस्थिति कथं पाइ । मचाबलय् न्ह्यवःसा मोटरय् म्हिती । उलि दःसा गाइ । इच्छा पूवनी । तर जब वयस्क जुइ । अन न्ह्यवःसा मोटरं गाइ मखु । लखौंलख वंगु मोटर माली । गाडी माली ।थन गुलिस्यां थम्हं यानागु इच्छा पूवंकेत भाकल याइ । द्यइके वनी । गुलि इच्छा अःपुक याउँक पूवनी । थःगु आज्जुइ थ्यनी । खय्त ला दुनुगलंनिसें याःगु इच्छा याकनं पूवनी । याकनंं आज्जुइ थ्यंके फइ धाइ । तर सकसियां इच्छा याकनं पूवनी नं मखु । इच्छा याःकथं आज्जुइ थ्यंके फइ धइगु नं मदु । थुकिया लागिं लां लां ई कायेफु । दँ दँ नं कुतः याये मालेयः । अझ जीवनकाःछि थःगु आज्जु लुमंकाः न्ह्याये मालेयः ।

दुःख कष्ट नं सह याये मालेयः ।तथागत बुद्धं बुद्धत्व प्राप्त यायेगु इच्छा यानाबिज्यात । बुद्धत्व प्राप्ति हे थःगु आज्जु तायेकाबिज्यात । उकिं वसपोलं गृहत्याग यानाबिज्यात । थःगु आरामदायी जीवन त्वःता– बिज्यात । साधारण जीवन हनाबिज्यात । अझ खुदँ तक नये त्वने तकं त्वःताबिज्यात । अतिकं कष्ट सियाः दुष्करचर्या यानाबिज्यात । तर थुकिं छुं कथंया लाभ मजुल । थम्हं इच्छा याःकथं आज्जुइ थ्यंके मफुत । अनं लिपा वसपोलं अधिष्ठान याना बिज्यात । वसपोल सोत्थिय ब्राम्हणं बिउगु घाँसय् फ्यतुना बिज्यात । बुद्धत्व प्राप्त मयाःतले आशनंं दने मखु धकाः अधिष्ठान यानाबिज्यात । थुगु अधिष्ठानं वसपोलं थःगु इच्छा पूवंके फत । आज्जु प्राप्त याये फत । समाजय् अतिकं सःसिउपिं नांदंपिं नं दइ । समाजं उमित उच्च दर्जाय् तया तइ । उमिगु संगतं जीवन सफल जुइगु तायेकी । तर गबलें थुकथंयापिनि संगत याःसां थःगु आज्जुइ मथ्यनेफु । थम्हं यानागु इच्छा पूमवनेयः । अझ इमिपाखें आशा याःकथं थःगु आज्जु ज्वःमलाये नं यः थःगु इच्छा पूवंकेत, आज्जुइ थ्यंकेत इमिपाखें तापाना वने नं मालेयः । तथागतयात नं थथे हे जुल ।

वसपोल थःगु आज्जुइ थ्यंकेत आलारकालाम उद्दकरामपुत्रपिनि आश्रमय् बिज्यात । तर इमिगु ज्ञानंं वसपोलया इच्छा पूवंके मफुत । वसपोलयात थःगु आज्जुइ थ्यनी थें मताल । उकिंंं वसपोलं इमिगु आश्रम त्वःता बिज्यात ।सकसिनं आरामदायी जीवनया इच्छा याइ । सुखदायी विलासी जीवन हनेगु इच्छा सकसिकें दइ । थुकिं सुयातं गबलें त्वःती मखु । मांबौनापं जीवन हनेगु अझ थः कायम्ह्याय्पिं नापं सुख जीवन हनेगु इच्छा सकसिनं याइ । श्रीसम्पत्ति मुनाः थः कलाः व सन्तान नापं म्वायेगु नं जीवनया तःधंगु इच्छा कथं काइ । तर सकसिकें थुकथंया जक इच्छा मदयेफु । तथागतं भौतिक आरामदायी जीवन स्वयां मनया सुखदायी जीवन हनेगु इच्छा यानाबिज्यात । थुगु इच्छाया फलकथं वसपोलं राज्यभोग त्वःता बिज्यात । सुन्दर चारिका नापनापंं भोगबिलास त्याग यानाबिज्यात । वसपोलयाके अनित्य बोध यायेगु इच्छाशक्ति ब्वलंगु खः । खय्त ला तथागत बुद्धं वर्तमानय् जक मखु । अतीतय् नं थुकथंया इच्छा यानाबिज्याःगु खः । कामभोगया इच्छा त्याग यानाबिज्याःगु
खः । थुकथंया खँ युधञ्चय जातकय् न्ह्यथनातःगु दु ।

सब्वदत्त जुजुया दकले तःधिकःम्ह काय् युधञ्जय खः । तःधिकःम्ह जूगुलिं वयात उपराज (युवराज) दयेका बिल । वयात उकथं राजकीय सम्मान नं बिल । आरामदायी जीवन हनाच्वन । छन्हु व उद्यानय् चाःहिउ वन । वं अन खसुति (शीत) खन । छुं ई लिपा व तना वन । थ्व खनाः वयाके संबेग ब्वलन । प्राणीया जीवन नं घाँसय् च्वंगु खसुति थें ताल । थुकिं वयात विरक्त याना बिल । व बौ सब्वदत्त जुजुयाथाय् वन । वं थः प्रवजित जुइगु उजं फ्वन । तर बौम्ह माने मजू । जुजुं थः काय्यात प्रवजित मजुइत इनाप यात । वयात छुं कथंया मगाः मचाःगु दःसा पूवंकेगु बचं बिल । कष्ट दःसां चीका बीगु बचं बिल । तर कामभोगपाखें तापाक च्वनेगु इच्छा याःम्ह युवराजं छुं कथं कष्ट मदुगु खँ कन । वं थम्हं जरा जीर्णतां त्वपू वये मफइगु द्विप दयेकेत इच्छा यानागु खँ कन । वं बौम्हेसिया खँ मन्यन । अनंलि मांम्ह वयाः युवराजयात गंवल । मांयात नं वं थःगु इच्छा मत्वःतेगु खँ कन । थःगु इच्छा पूवंकेत मां पंगः मजुइगु इनाप यात । अन्तय् अबुम्ह हारे चाल । अले धाल—‘थःगु इच्छा पूवंकी । प्रवजित जू हुँ ।’
थन युधञ्चय थः मांबौ मययाः प्रवजित जूवंगु मखु ।

आरामदायी जीवन हनेत प्रवजित जूगु नं मखु । बरु थम्हं इच्छा यानागु पूवंकेत खः । जराया वसयात त्वःथलेत खः । मनूया इच्छा शक्ति अपार । थ्व छगू नापनापं मेगु स्वनाः वयाच्वनी । छगू इच्छा पूवनेवं मेगु इच्छा ब्वलनीगु साधारण मनूया स्वभाव खः । सकसिकें असिमित, अनियन्त्रित इच्छा दइ । थ्व हे इच्छायात बसय् च्वनाः जीवन हनी । अपार इच्छा दुने अवस्थित इच्छां थाय् काइ । थुकिया कारणं जिउगु मजिउगुं ज्याखँ याइ । भिंगु नापनापं मभिंगु कर्म नं याइ । च्यागू लोक धर्म ब्वलंकीगु मूलद्वार नं इच्छा शक्ति हे खः । शान्त व द्वन्द्वया थाय् नं थुकिं काइ । खय्त ला इच्छा शक्ति मनूयाके जक दइगु मखु । थ्व हरेक प्राणीयाके दइ । तर मनू सर्वश्रेष्ठ प्राणी खः । विवेकशील प्राणी उकिं मनुखं हरेक पल ब्वलनीगु इच्छाशक्तियात ध्वाथुइके फयेकेमाः । थुकिं ब्वलनीगु लिच्वःया बोध यायेमाः । सकसियां हित जुइगु इच्छा ब्वलंकेगु हे वास्तवय् इच्छा यायेगु खः । थुकिया लागिं कुतः याःम्हं सदां थःगु आज्जुइ थ्यनी ।