ने. सं. ११४४ ञलागा पारू -

असम्भव प्रजनन

नेपाली सिनेमाया छम्ह नायिका । पूजा शर्मा नां । वयाके सिनेमा पत्रकार प्रकाश सुवेदीं अन्तर्वार्ता काइ । नायिकाया सामान्य ज्ञान विषयय् न्ह्यसः तइ । नेपालय् ग्वःगू जिल्ला दु ? नायिकां लिसः बी ‘झिंछगू ।’ हास्यास्पद । लिसः नायिकाया तामझाम, झःझः धाःगु श्रृंगारयात मल्वःकथं जुयाबी । स्वयाच्वंपिंत हे मछालापुसे अनुभव जुयाबी । तर । मनय् लू थे लिसः बिउम्ह नायिकायात छु निं छु ! हर्रर न्हिलाः थःगु कमजोरीयात ब्वयेका बी ।

खैर । सिनेमाया फुक्क कलाकारत थथे हे जुइ । सामान्य ज्ञानया खँय् कमजोर हे जुइ । साधारिकरण याये फइ मखु । याये मजिउ । बौद्धिक नायिकात मदुगु मखु । तर । अक्सर । सिनेमा कलाकारतसें थःगु मष्तिष्कया सुन्दरतायात उलि चिउताः तइमखु । ख्वाः, म्हबांचिया आकर्षणया भरय् स्थापित जुइत स्वइ ।

थ्व खँय्् । थौंकन्हय्या राजनीतिक नेतात व सिनेमाया नायक नायिकातय् स्तर समान खनेदइ । छम्ह मन्त्री । अबलय् वन विभागया मन्त्री । भाषणय् मन्त्रींजुं धाइ ‘झीसं सिमापाखें कार्बन डाइअक्साइड कयाः, सिमायात अक्सिजन बी ।’ अबलय्या वनमन्त्री थौंकन्हय् पर्यटन मन्त्री जुयादीगु दु । थौंकन्हय् सेलिब्रिटीतसें व राजनीतिक नेतातय्सं न्ह्यागु धाःसां शिरोपर यायेमाः । मूक जुयाः न्यनेमाः । मूर्ख जुयाः स्वीकार यायेमाः ।

नायिका पूजा शर्मां छगू मेगु अन्तर्वार्ताय् अन्तर्वार्ताकार प्रकाश सुवेदीयात छेडछाड यानाः धाइ, ‘जिं नेपाःया जिल्ला झिंछगू धकाः धइगु खँ प्रकाशयात गाक्कं फाइदा यात । कार्यक्रम भाइरल जुयाः प्रकाश सुवेदी प्रचार वल । प्रकाश सुवेदीयात ज्यःनाः, बेली चूलाकेत जिगु अन्तर्वार्तां गाक्कं ग्वाहालि याःगु दु । जिं गर्व याये ।’

स्वयादिसँ । थौंकन्हय्या सेलिब्रिटीतय् म्वायेगु हर्कट ! मेम्ह नं सेलिब्रिटीया करामत नं न्ह्यथने । सिने नायिकाया प्वाथय् दइ । प्वाः जाया वइ । नायिकाया मिजंनं मिसाया प्वाथय् न्हिं न्हिं ‘किस’ याःगु किपात फेसबुकय् वयाच्वनी । मचा बुइ त्यइ । नायिकां थःगु तज्याइ थें च्वंगु प्वाः उली, वया भाजुं नं प्वाः उली । निम्हेसिनं प्वाः ल्वाकी फेसबुकय् किपा ब्वइ । भाइरल जुइ । लखौं मनूतसं ‘लाइक’ याइ । सम्बन्धित नायिकां गर्व याइ ।

लखौं मनूतसं जिमित ययेकी । निम्ह, प्यम्हेसिनं कुंखिनाः जिमि सँ छपु नं उखे थुखे याये फइमखु । धाइ थौंकन्हय् प्रत्येक मनूया थःथःगु कथं जुइगु अधिकार दु । सुनानं सुयातं हस्तक्षेप यायेगु अधिकार मदु । थ्व धापूयात मनग्य छ्यले दुपिं सेलिब्रिटीत खः । राजनीतिज्ञत नं थ्व खँय् उतिकं हे भाग्यमानी । राष्ट्रिय सेलिब्र्र्रिटी खः । धाये फइ । माल कि गुगुं दलं गुगुं दललिससे नं ज्वःचिने जिउ । फु । प्वाः ल्वाके जिउ । न्ह्यागुं ल्वाके जिउ । जिउ मजिउया सीमा मदु । सिद्धान्तया आधार मदु । मौका वल कि चौका ह्वायेमाः । नेपाःया राजनीतिया ख्यलय् नग्नतायात छुट दु ।

थौंकन्हय् सिने नायिकातय् मेगु प्रचलित फेसन खः थीमत्यः अर्थात रजस्वला बारे अन्तर्वार्ता बिया जुइगु । खः । थौंकन्हय् महिला सशक्तिकरणया अभियन्तातय्सं ‘रजस्वलाप्रतिया रुढ प्रथा, महिलातय्त मुक्ति बीगु अभियान’ न्ह्याकाच्वंगु दु । विशेष यानाः गां गामय् रुढ अन्धविश्वासी धारणां रजस्वलाया इलय् महिलातय्सं तःधंगु दुःख, यातना फये मालाच्वंगु दु । छाउपडी प्रथां यानाः मिसातय् ज्यान हे खतराय् लानाच्वंगु दु । थी मत्यः बारे सही ज्ञान बियाः महिला वर्गत दथुइ जनजागरण थनेगु जरुर समयया माग जुइ ।

तर, जनस्तरय् प्रभावकारीकथं न्ह्याके माःगु जागरण अभियानयात सिने सेलिब्रिटीतय् चमक दमकं जाःगु अन्तर्वार्तां पूवंके फइमखु । ‘मिजंतय् वीर्य शुद्ध ! मिसातय् रजस्वला जक छाय् अशुद्ध ?’ छम्ह नारी अभियन्ता थ्व रजस्वलाप्रति पक्षपात खः । विरोध थ्वयेकी । खः, पक्षपात दु । तर प्रजनन मदिउनि । तर । अफसोच ! देय्या राजनीति थौं नपुंसक । वीर्य शुन्य ! शुष्क रजस्वला ! विकास, समृद्धिया प्रजनन असम्भव । देय् सुखूचिना वंगु दु ।