ने. सं. ११४४ चौलाथ्व एकादशी - कामदा एकादशी

झन् झन् अन्यौलय् देय्या राजनीति

पंचायतकालय् मण्डले विद्यार्थी संगठननाप ल्वायेत दक्व धइथें विद्यार्थी संगठनत छथाय् च्वनाः सत्ता पक्षया विद्यार्थी संगठन नेपाल विद्यार्थी मण्डल ल्वाइगु खः । उगु इलय् अनेरास्ववियु नामं वामपन्थी खेमाया सकल विद्यार्थी संगठन व नेविसंघया नामं नेपाली कांग्रेस पक्षया प्रजातान्त्रिक खेमाया विद्यार्थी संगठन राजनीतिक रुपं खडा जुयाच्वंगु खः । नापं अखिल व नेविसंघ मिले जुयाः नं अबलय् गबलें गबलें पंचायती ब्यवस्था वा तात्कालीन सत्ता विरुद्ध ल्वायेगु याः । नेपाल विद्यार्थी मण्डलयात फयांफछि स्वनिगः जक मखु, स्वनिगलं पिने नं बुकेगु यानाच्वंगु खः । २०२४ सालय् प्राप्त जूगु अज्याःगु विद्यार्थी युनियनया चुनावयात नेपाली कांग्रेस व नेविसंघ अले वामपन्थी घटक व अनेरास्ववियुं थःपिनि राजनीतिक मञ्चकथं प्रयोग यानाच्वंगु खः । थौं वयाः अनेरास्ववियु व नेविसंघ खुलमखुल्ला राजनीतिक संगठनकथं न्ह्यःने वःगु जक मखु इमिगु मातृ संगठन थीथी वाम घटक व नेपाली कांग्रेस नं राजनीतिइ न्ह्यःने खने दयाच्वंगु दु। तर विडम्बना न्हापा गथे नेपाल विद्यार्थी मण्डलं पंचायती ब्यवस्थाया जक पृथपोषण यानाः गुण्डागर्दी शैलीं सत्ता टिके यायेत ज्या याइगु खः । थ्व इलय् नं विद्यार्थीतय् माग व आवश्यकता स्वयां नं सत्ता टिके यायेगु व थःगु मातृ पार्टीया न्ह्याःगुकथंया कमिकमजोरी, गल्ती, अनैतिकता जूसां मौन च्वनेगु ज्या थुमिसं यानाच्वंगु दु ।

म्हिगः थःपिनि मातृ संगठन वा पार्टी सत्ताय् वनाः मचिकंया भाः, पेटोलया भाः व थीथी उपभोग्य सामानया भाः थकाइगु इलय् थुपिं विद्यार्थी संगठनं थःगु हे मातृ पार्टी विरुद्ध नं आन्दोलन याना क्यंगु इतिहास नेविसंघ व अखिलयाके दु। तर थ्व इलय् सछि व नीतका वंगु तूचिकं निसः व नीतका काःसां, ४६ तकां लाःगु पेटोल ११९ तका काःसां अले वस्तुया भाःनं झिदुगं नीदुगं अप्वः जूसां थुपिं विद्यार्थी संगठनं सः थ्वयेकूगु खनेमदु। उलि जक मखु, मातृ संगठनया सः बेथासय् हे लाःसां उकियात हे नतमस्तक जुयाः क्वबियाः लहै लहैलय् वनाः आत्मबलिदान यायेगु ज्या यानाच्वंगु दु। देसय् अप्वःगु भ्रष्टाचारया उन्मूलन, हाकुबजाःया नियन्त्रण, चोरी, डकैटी, बलात्कारया उन्मूलनयात प्रगतिया लँपुइ यंकेगु ज्याय् पार्टीया निर्देशन वा आदेशयात लना च्वनेगु ज्या विद्यार्थी संगठनतय्सं यायेम्वाः । थःगु हे कथंया नीति, निमय व छगू ल्याखं अनुशासन दयेकाः उकिया आधारय् न्ह्याः वनाः युवा पुस्तायात नैतिकवान यायेगु ज्याय् विद्यार्थी संगठनं न्ह्याबलें गतिविधित सञ्चालन याना च्वनेमाःगु खः । तर थौं अज्याःगु वातावरण सिर्जना जुयाच्वंगु खनेमदु ।

मातृ संगठनया अभियान ताःलाकेत भातृ संगठनतय्सं ग्वाहालि यायेगु व भातृ संगठनयात संकट जुइगु इलय् मातृ संगठनं राजनीतिक हैसियतं छु गुकथं ग्वाहालि यायेगु चलन पंचायतकालय् जक मखु, प्रजातान्त्रिक शासन पद्दतिया विकास जुइ धुंकाः नं निरन्तरता कयाच्वंगु खः ।

मातृ संगठनया अभियान ताःलाकेत भातृ संगठनतय्सं ग्वाहालि यायेगु व भातृ संगठनयात संकट जुइगु इलय् मातृ संगठनं राजनीतिक हैसियतं छु गुकथं ग्वाहालि यायेगु चलन पंचायतकालय् जक मखु, प्रजातान्त्रिक शासन पद्दतिया विकास जुइ धुंकाः नं निरन्तरता कयाच्वंगु खः । तर थौं खुल्ला राजनीतिक वातावरण व सहज राजनीतिक वातावरण चूलागु कारणं खइ, आः सुयातं चिउताः दयाच्वंगु खने मदुसा, अज्याःगु वातावरण नं खनेमदु। भातृ संगठनतय्सं छु ज्या यानाच्वन धइगु मातृ संगठनं सिउ । न त मातृ संगठनया मिलन, विछोड वा गूट उपगूट दयेकाः पार्टी विभाजन व टुटफुट यायेगु बालहठ जुयाच्वंगुया विषयय् भातृ संगठनं सचेत यायेगु यानाच्वंगु दु। थ्व वर्गीय संगठनयात दबाव समूह, सहयोगी समूह वा नीति कार्यान्वयन समूहकथं विकास यायेगु पहल निरन्तर मयागुया लिच्वः खः । म्हिगः नेविसंघया इतिहास नेपाली कांग्रेसया निर्देशनं तयार यानातःगु दयाच्वनी । अनेरास्ववियुया इज्जत वामपन्थी राजनीतिक दलतय्सं बचे यानातःगु दइ । तर थ्व परम्पराय् आः गाक्कं ¥हास वःगु दु। थ्व इलय् नेविसंघ व अखिलं मातृ पार्टीया नेता जूपिंसं तकं उकियात आदर्शकथं नालाकाःगु खनेमदु ।

थौं लोकतन्त्र रक्षाया लागि कम्युनिष्ट विरुद्ध ल्वायेगु कांग्रेस सभापति शेरबहादुर देउवां घोषणा याःगु दु। म्हिगः लोकतन्त्रयात नारायणहिति दरवारय् बह्रः तयाः देसय् संकट ब्वलंकेगु ज्या याःम्ह शेरबहादुर देउवा हे खः । आन्दोलनया मैदानं हे हथाय्पथाय् चायाः दौरा सुरुवाल पुनाः सूर्यबहादुर थापाया थासय् थः नं छम्ह जुजुया पहरेदार जुयाः ज्ञानेन्द्र सरकारयात सबल यायेगु ज्या अबलय् शेरबहादुरं याःगु खः । प्रजातन्त्र व लोकतन्त्रया हत्या लोकतान्त्रिक पद्धतियात स्थापित याःगु शक्तिं हे याःगु खःसा थौं उकिया अःखः थः प्रगतिशील जुयाः कम्युनिष्टतय्सं दरवारय् सत्ता बुझे याइन धकाः हाला जूगु अवस्था दु। म्हिगः थम्हं दरवारयात सत्ता बुझे याये यंकूथें आःया अन्यौलपूर्ण वातावरणया निकास नं दरवार हे जुइफुगु वयागु अनुमान जुइफु। तर थौं ई आपालं परिवर्तन जुइधुंकूगु दु। म्हिगःया सत्ता व थौंया सत्ता दथुइ आपालं भिन्नता वयेधुंकूगु दु ।

कम्युनिष्टतयस्ं सर्वसत्तावाद हावी यानाच्वंगु तर्क थौंया मखु। कम्युनिष्टत सत्ताय् वंसानिसें उमिसं थ्वयेका च्वंगु सः खः । अथे खःसां चुनावं वःगु सरकारयात सर्वसत्तावादी धकाः द्वपं बीगु गुलित उचित? थुखे नं राजनीतिक पार्टीतय्सं ध्यान तयेमाः । म्हिगः पंचायती ब्यवस्थां गुकथं सर्वसत्तावाद हावी यानाच्वंगु खः । जुजु ज्ञानेन्द्रया पालाय् नं उकथं ज्या याःगु खः । आः उकियात परिवर्तन यायेमाःगु अवस्था दु। कम्युनिष्ट घटक सत्ताय् थ्यंसां वा प्रजातान्त्रिक शक्ति हे सत्ताय् च्वंसां म्हिगःया प्रतिगमनकारी शक्ति खनाः सतर्क जुइगु त्वःते मजिउ। पंचायत, प्रजातान्त्रिक बहुदलीय शासन पद्दति स्वयां नं संविधानसभां तयार यानातःगु संविधानकथं मुलुक चले जुइधुंकूगु इलय् सामान्य खँय् नं राजनीतिक पार्टीत म्वाः मदुगु द्वपं बियाः आः कम्युनिष्ट विरुद्ध छप्पँ जुयाः ल्वायेगु ई वल धकाः मूल्यांकन यायेगु पाय्छि मखु। बरु इमिसं याःगु कमि कमजोरीयात न्हाय्कनय् ख्वाः क्यनेथें क्यनाः थःगु कमि कमजोरीयात चिइकेगु वातावरण तयार याये फयेकेमाः । म्हिगः सत्ताय् थ्यनीगु इलय् फुक्कं पाय् छि, आः सत्तां पिने लायेवं छुं नं खँयात स्वीकार यायेगु जुइमखु धइकथं मूल्यांकन यायेगु उचित मजू । सारा जनतायात सुधारात्मक सोच व परिवर्तनया लागिं प्रशिक्षित यायेत विद्यार्थी संगठनतय्सं मातृ संगठनयात सल्लाह बी फइगु वातावरण तयार यायेमाः । वर्गीय संगठनपाखें मातृ संगठनयात सदां रचनात्मक सुझाव व ग्वाहालि याये फयेकेमाः । अले जक सुनां सुयातं तेरे मदइगु वातावरणया अन्त्य जुइ । बल्ल न्हूगु नेपालया नारा सार्थक जुइ ।