‘पशुपतिया सम्पदा पुनर्निर्माण पारदर्शी या’
येँ – पशुपति क्षेत्रया सम्पदा पुनर्निर्माण यायेगु झ्वलय् पारदर्शी यायेत संस्कृति, पर्यटन तथा नागरिक उड्डयन मन्त्र उमाशंकर अरगरियां निर्देशन बियादीगु दु । म्हिगः पशुपति क्षेत्र दुने दयेकत्यंगु राममन्दिरया उलेज्या यासें मन्त्री अरगरियां पशुपति क्षेत्रया पुनर्निर्माणया ज्यायात पारदर्शी यायेत निर्देशन बिसें थः गुगुं नं इलय् अनुगमनय् वयेगु जुइ धकाः ख्याच्वः नं बियादीगु खः ।
वय्कलं थम्ह भ्रष्टाचार याके मबिगु खँ कनादिसें थम्हं नं भ्रष्टाचार मयायेगु व मेपिंत नं भ्रष्टाचार याके मबिउगु थःगु आज्जु जूगु खँ नं धयादीगु दु । ज्याझ्वलय् न्ववायेगु झ्वलय् वय्कलं धयादिल, ‘पारदशी यानादिसं, जि व्यक्तिगत भ्रष्टाचारया विरुद्धया आन्दोलनं थौं मन्त्री तक जूगु दु, जिगु छगू जक आज्जु जुइ, नत थम्हं नयेगु जुइ, न मेंपिंत नकेगु जुइ, अथे जुयाः पारदर्शी रुपं ज्या यानादिसँ, मखुसा जि न्ह्याबलें थः वयाः स्वः वयेगु जुइ, चेक यायेगु जुइ, उखेपाखे जिं आः हे सतर्क व सजग याकाच्वना ।’
देगः पुनर्निर्माण यायेबलय् पशुपति क्षेत्रया साधु सन्तपिंत विस्थापित यायेत्यंगु धासें साधु सन्तपिसं विरोध प्वंकाच्वंगु खँय् मन्त्री अरगरियां साधु सन्तपिंत विस्थापित मयायेगु खँ धयादिल । वय्कलं पुनर्निर्माणया ज्या क्वचायेवं उमित पुर्नस्थापन यायेगु खँ धासें धयादिल, ‘जिगु मन्त्रालय संस्कृतिया रक्षा याइगु मन्त्रालय खः, संस्कृति रक्षा जुइ, पुनर्निर्माण ज्या क्वचायेवं बाबापिंत पुर्नस्थापना यायेगु जुइ ।’
थ्व स्वयां न्ह्यः स्थानीय वासिन्दां पशुपति क्षेत्रया गुरुयोजनाया नामय् थःपिंत विस्थापित यायेत्यंगु धासें गुरुयोजनाया विरोध याना वयाच्वंगु खः ।
LEAVE YOUR COMMENTS