राष्ट्रपतियात दशअवतार मक्यं
येँ – थुगुसी दश अवतार बन्द जुइगु हल्ला जूसां म्हिगः बहनी धाःसा लिबाक दश अवतार क्यनेगु ज्या जुल । अथे खःसां कुमारी सालीथाय् झाःम्ह राष्ट्रपतिया न्ह्यःने धाःसा दशअवतार क्यने मखन । म्हिगः बहनी लिबाक जक ध्यबा वःगुलिं दशअवतार नं लिबाक जक हे क्यंगु खः ।लिबाक ध्यबा वःगुलिं दशअवतार क्यनेत माःगु सामान न्याये मखंगुलिं राष्ट्रपतिया न्ह्यःने क्यने मखंगु खँ समाजया दुजः राजन शाहीं ‘नेपालभाषा टाइम्स’ यात कनादिल ।
निन्हु तक दश अवतार प्रदर्शन तथा प्रवद्र्धन समाजया दुजःपिंसं हे ध्यबा तयाः प्रदर्शन याःगु खःसा म्हिगः ध्यबा मदयाः प्रदर्शन यायेगु ज्या दीत्यंगु खः । भाजु शाहीं दश अवतार क्यनेत ध्यबाया जक मखु व्यवस्थापनया नं समस्या दुगु खँ नं कनादिल ।
यँयाः जात्रा न्ह्यवंनिसें दश अवतार क्यनेत समस्या जुइ धया वयाच्वंगु खःसां उकियात कयाः सुनां नं चिउताः मतःगुलिं दश अवतार क्यनेगु इलय् समस्या वःगु खँ नं वय्कलं कनादिल । दश अवतार क्यनेत न्यय्म्ह स्वयां अप्वः मनू खटे जुइमाःगु जुयाः खर्च नं अप्वः दुगु खँ धाःगु दु ।
LEAVE YOUR COMMENTS