थीथी थासय् रक्तसंचार सेवा दिवस

येँ – नेपाल स्वयमसेवी रक्तदाता समाजं थीथी थासय् हिदान ज्याझ्वः यासें नेपाल रेडक्रस सोसाइटी रक्तसंचार सेवा दिवस हंगु दु । समाजं स्वनिगःया स्वंगुलिं सहरय् हिदान ज्याझ्वः यानाः केन्द्रया ५५ क्वःगु स्थापना दिवस हंगु खः ।

‘नियमित हिदान स्वस्थ जुइगुया परिणाम’ धइगु मू नारा बियाः उगु हिदान ज्याझ्वः याःगु खः । समाजया ख्वप शाखाया ग्वसालय् जूगु हिदान ज्याझ्वलय् ख्वीनिम्हेसिनं हिदान यानादीगु खः ।

अथे हे समाजया यल जिल्ला शाखाया ग्वसालय् जूगु हिदान ज्याझ्वलय् नीखुम्हेसिनं हिदान यानादीगु खःसा समाजया विशेष आह्वान व स्थानीय क्बलया संयोजनय् येँ मपा २८ वडा बागबजारय् जूगु हिदान ज्याझ्वलय् पीप्यम्हेसिनं हिदान यानादीगु खः ।

हिदान यानादीपिं समाजया केन्द्रीय अध्यक्ष प्रेमसागर कर्माचार्य, नेरेसो स्वास्थ्य सेवा विभागया निर्देशक डा. मनिता राजकर्णिकार, २८ वडाअध्यक्ष भाइराम खड्गीं दसिपौ लःल्हानादीगु खः ।