सम्पदा संरक्षण समाजया न्हूधाः
येँ(नेपालभाषा टाइम्स)- थनया भिंद्यः त्वालय् च्वंगु सम्पदा संरक्षण समाज नेपालया न्हूधाः याःगु दु । ताःई न्ह्यःनिसें स्वनिगःया मूर्त अमूर्त सम्पदा संरक्षण यायेगु ज्याय् क्रियाशील जुया वयाच्वंगु समाजया आः नकतिनि जूगु साधारण सभां न्हूगु ज्यासना पुचः ल्यःगु खः ।
साधारणसभां समाजया न्हूगु ज्यासना पुचःया अध्यक्षय् सुरज साय्मि मान्धरयात निर्विरोध निर्वाचित याःगु दु । समाजया वरिष्ठ उपाध्यक्षय् नवीन रंजित, उपाध्यक्षय् बसनारायण महर्जन, महासचिवय् रणबहादुर महर्जन, कोषाध्यक्षय् सुनिल डंगोल, सचिवय् अञ्जु रायमाझी व सह कोषाध्यक्षय् देवेन्द्रमान राजभण्डारीयात ल्यःगु दु ।
थुकथं हे दुजलय् सरिता मानन्धर, श्यामकृष्ण महर्जन, मचाराजा महर्जन व गिता महर्जन च्वनादीगु दु ।
महासचिव महर्जनं वार्षिक प्रतिवेदन व सह कोषाध्यक्ष राजभण्डारीं आर्थिक प्रतिवेदन न्ह्यब्वयादीगु साधारणसभाय् प्रतिनिसभा सदस्य सपना राजभण्डारी, बागमति प्रदेशसभा सदस्यपिं शैलेन्द्रमान वज्राचार्य, हरिप्रभा खड्गी श्रेष्ठ, येँ महानगरपालिका २० वडाअध्यक्ष राजेन्द्र मानन्धर लगायतं भिंतुना न्वचु तयादीगु खः ।
वंगु आर्थिक दँ ०७८÷७९ लय् थीथीकथंया झिंच्यागू ज्याझ्वः यानागु जानकारी बिउगु दु । थुकथं हे समाजं तःदँ न्ह्यःनिसें दिनाच्वंगु भिंद्यःया देगः न्ह्यःने यःसिं थनाः आलमत च्याकेगु ज्यायात नं निरन्तरता बिउगु खः ।
LEAVE YOUR COMMENTS