ओलीया २० म्ह मन्त्रीत पदमुक्त
येँ- प्रधानमन्त्री केपी शर्मा ओलीं लिपांगु खुसी यानादीगु मन्त्रिपरिषद् विस्तार खारेज जूगु दु । सर्वोच्च अदालतपाखें म्हिगः अन्तरिम आदेश जारी यासें प्रम ओलीं निक्वः तक मन्त्रिपरिषद् विस्तार यानाः थपे याःपिं २० म्ह मन्त्रीत सकलें पदमुक्त जूगु दु ।
सर्वोच्च अदालतया प्रधानन्यायाधीश चोलेन्द्र शमशेर जबरा व न्यायाधीश प्रकाशु कुमार ढुंगानाया मंकाः इजलासं थ्व अन्तरिम आदेश बिउगु खः । प्रधानमन्त्री केपी अोलीं संसद विघटन यायेधुंकाः वय्कः स्वतः कामचलाउ प्रधानमन्त्री जुयादीगु कारणं वय्कःयाके मन्त्रिमण्डल विस्तार यायेगु छुं हे अधिकार दइ मखु धासें सर्वोच्चं वय्कलं यानादीगु मन्त्रिमण्डल विस्तारया ज्यायात बदर याना बिउगु खः ।
संविधानया धारा ७७ (३) या उपधारा १ कथं संसद विघटन जुइधुंकाः छु गज्याःगु अवस्थाय् मन्त्रिमण्डल दुगु खः वहेपाखें ज्या चले यायेमाः धइगु प्रावधान दुगु कारणं प्रधानमन्त्री ओलीं यानादीगु मन्त्रिमण्डल विस्तार अवैध ठहर जूगु खः ।
वय्कलं थःगु सरकार बल्लाकेगु लागिं जसपाया नेतातय्त नं मन्त्री दयेकाः मन्त्रिमण्डल विस्तार यानादीगु खः । तर थ्व फैसला लिपा जसपाया सकलें मन्त्रीत पद मुक्त जूगु दु ।
सर्वोच्चया आदेश लिपा पदमुक्त जूपिं उपप्रधानमन्त्रीत रघुवीर महासेठ व राजेन्द्र महतो, मन्त्रीत खगराजा अधिकारी, शरतसिंह भण्डारी, अनिलकुमार झा, शेरबहादुर तामाङ, राजकिशोरा यादव, लक्ष्मणलाल कर्ण, नैनकला थापा, ज्वालाकुमारी साह, विमलप्रसाद श्रीवास्तव, उमाशंकर अरगरिया, चन्दा चौधरी, एकवाल मियाँ, नारदमुनि राना, गणेशकुमार पहाडी, मोहन बानियाँ, राज्यमन्त्रीत चन्द्रकान्त चौधरी, रेणुका गुरुङ व आशा कुमारी विक खः ।
प्रम ओलीं जेठ ७ गते संसद विघटना यानादीगु खःसा जेठ २१ गते व जेठ २७ गते निक्वः यानाः २० म्ह मन्त्रीत थपे यानादीगु खः ।
सर्वोच्च अदालतया थ्व आदेश लिपा आः ओलीया मन्त्रिमण्डलय् प्रम समेत यानाः मुक्कं न्याम्ह जक दुजः कायम जूवंगु दु । उकी ओली बाहेक अर्थ मन्त्री बिष्णु पौडेल, कानूनमन्त्री लिलानाथ श्रेष्ठ, शिक्षा मन्त्री कृष्णगोपाल श्रेष्ठ व भौतिक पूर्वाधार मन्त्री बसन्तकुमार नेम्बाङ जक ल्यं दनि ।
अप्रत्याशित फैसला ः एमाले
सर्वोच्च अदालतपाखें थज्याःगु फैसला वयेवं सत्तारुढ दल नेकपा –एमालें) थुकियात ‘अप्रत्याशित फैसला’ धकाः प्रारम्भिक प्रतिक्रिया बिउगु दु । एमालेया प्रवक्ता प्रदीप ज्ञवालीं सर्वोच्चपाखें अप्रत्याशित फैसला वःगु धासें थुकिं देय्या राजनीतियात अझ जटिल मोडपाखे यंका बिउगु खँ धयादीगु दु । सञ्चार माध्यमलिसे खँ ल्हासें वय्कलं थ्व फैसलायात कयाः पार्टी दुने थप सहलह जुइगु जानकारी नं बियादिल । सहलह लिपा थप खँ वइ धासें वय्कलं फैसलां यानाः आः राजनीति झन् हे जटिलतापाखे वनीगु सम्भावना थःपिंसं खंकाच्वनागु खँ नं कनादिल ।
LEAVE YOUR COMMENTS