झिन्हुया दुने तार चीका छ्वयेत उजं

यल (नेपालभाषा टाइम्स)- यलया सम्पदा लागाय् तयातःगु फोहोर खने दयेक तयातःगु थीथी कथंया तार झिन्हुया दुने चीका छ्वयेगु लागिं यल महानगरपालिकां निर्देशन बिउगु दु । यदि झिन्हुया दुने थ्व तार चीका मछ्वल धाःसा महानगरपालिका थःपिंसं हे अज्याःगु तार चीका छ्वयेगु जुइ धकाः ख्याच्वः नं बिउगु दु ।

म्हिगः यल मनपाय् अज्याःगु तार व्यवस्थापन सम्बन्धी सहलह ज्याझ्वलय् न्ववासें यलया मेयर चिरिबाबु महर्जनं धयादिल, ‘यल देय् धइगु सांस्कृतिक सम्पदाया शहर खः, तर सम्पदाया फोटो छपाः काये माल धाःसा वहे तारं पना बीगु । विदेशीतय्सं थ्व तारया बारे धाःगु खँ न्यनाः जितः ला मछाःसे हे च्वनेधुंकल ।’

मनपां आः तत्काल हे यलया प्यंगः थूर, कुम्भेश्वर देगः लागा, लाय्कू लागा व बुंगद्यःया रथ दयेकीथाय् तयातःगु वायांवायां तार चीका छ्वयेत निर्देशन बिउगु दु । तार चीका छ्वयेगु जिम्मा इन्टरनेट सर्भिस प्रोभाइडर एशोसियसनयात बिउगु दु । उगु संस्थायात तार चीकेगु लागिं माःगु ग्वाहालि यायेगु खँ नं मनपां धाःगु दु ।

थज्याःगु तारं यानाः यलयात स्मार्ट सिटी दयेकेगु मनपाया ग्वसाःयात हाथ्या जुयाच्वंगु धासें मेयर महर्जनं अज्याःगु तार चायेकेगु लागिं मनपां मेशिन नं न्याना हयेधुनागु खँ धयादीगु दु ।