प्रमं न्ह्यब्वल नीति तथा कार्यक्रम

येँ – प्रधानमन्त्री केपी शर्मा ओलीं म्हिगः राष्ट्रया नामय् सम्बोधन यासें सरकारया नीति तथा कार्यक्रम सार्वजनिक यानादिल । नीति तथा कार्यक्रम राष्ट्रप्रमुखपाखें सार्वजनिक यायेमाःगु खःसां सरकार कामचलाउ अवस्थाय् लानाच्वंगु जुयाः राष्ट्रपतिपाखें थुगु ज्या मयाःगु खँ धाःगु दु ।

तर म्हिगः प्रधानमन्त्रीपाखें नीति तथा कार्यक्रम मधासे राष्ट्रया नामय् सम्बोधन यायेगु धासें आः वइगु दँय् सरकारं ज्वनीगु नीति तथा कार्यक्रम सार्वजनिक यानादीगु खः ।

थःगु सम्बोधनया झ्वलय् वय्कलं थ्वहे नीतिया आधारय् अर्थमन्त्रीपाखें बजेट सार्वजनिक याइगु जानकारी नं बियादीगु खः । म्हिगः अर्थमन्त्री बिष्णु पौडेलं आर्थिक सर्वेक्षण नं सार्वजनिक यानादीगु खः ।

प्रम ओलीं थःगु सम्बोधनया झ्वलय् पार्टी दुने ब्वलनाच्वंगु आन्तरिक कचवंया बारे नं न्ववासें वहे कारणं देशय् राजनीतिक अस्थिरता ब्वलंगु खँ कनादीगु खः ।

वय्कलं देश विकासया लागिं राजनीतिक स्थिरता आवश्यक खः धासें थ्वहे राजनीतिक स्थिरता प्राप्त यायेगु लागिं चुनाव यायेमाःगु बिचाः नं न्ह्यथनादिल । वय्कलं थ्वहे दँय् प्रतिनिधिसभाया चुनाव व स्थानीय चुनाव नापं यानाः निगू चुनाव याये मानिगु खँ नं स्पष्ट यानादिल ।
जलवायु परिवर्तन बारे विश्वया ध्यान साला कायेगु लागिं न्हापा जूगु सगरमाथा संवादयात हानं न्ह्याकेगु खँ नं वय्कलं स्पष्ट यानादिल ।
सम्बोधनय् प्रम ओलीं थःगु कार्यकालय् आपालं जूगु उपलब्धी बारे कँसें नेपालं फुटबल कासा त्याकूगु विवरण समेत न्ह्यब्वयादीगु खः ।