काेराेना विरुद्ध खाेपया माग यासे इन्धन ढुवानी बन्द
येँ – कोरोना भाइरस विरुद्धया खोप माग यासें ट्यांकर चालकपिसं आन्दोलन याःगु दु । चालकपिसं पेट्रोलियम पदार्थ ढुवानी ठप्प यानाबिउगु दु । नेपाल पेट्रोलियम ट्यांकर चालक संघया आह्वानय् संघया बागमति प्रादेशिक ज्याकू थानकोटं जिल्ला व पम्पय् म्हिगः निसें ज्या दिकाबिउगु खः । चालकया आन्दोलनया कारणं यानाः प्रादेशिक डिपोय् अमलेखगन्ज डिपो व बरौनीपाखें जुइगु ढुवानी नं अवरुद्ध जूगु दु ।
संघया अध्यक्ष ईश्वर लामां कोरोना महामारीया कारणं चालक व उमि छेँजःपिनिगु ज्यान हे वनिगु अवस्था वलं नं डिपों खोपया व्यवस्था मयाःगुलिं आन्दोलन यायेमाःगु खँ धयादीगु दु । अध्यक्ष लामाया कथं अमलेखगन्जय् छम्ह चालकया ज्यान कोरोना संक्रमण जुयाः वंगु दुसा मेपिं चालकया छेँजःपिं नं गम्भीर रुपं कोरोना भाइरस संक्रमित जुयाः च्वंगुलिं थःपिनिगु सुरक्षायात ध्यानय् तयाः आन्दोलन यायेमाःगु खँ धयादीगु दु ।
मेखे निगमं धाःसा पेट्रोलियम पदार्थ ढुवानी मदिकेत संघया नाप वार्ता यायेगु कुतः जुयाच्वंगु जानकारी बिउगु दु । निगमया कथं म्हिगः निसें पेट्रोलियम पदार्थया ढुवानी ठप्प जूगु खः ।
LEAVE YOUR COMMENTS