स्वनिगलय् दकलय् अप्वः थिके
येँ(रासस)- देय्या मेमेगु थाय्या तुलनाय् स्वनिगलय् दकलय् अप्वः बजाः भाः थिके जूगु खनेदुगु दु । नेपाल राष्ट्र बैंकं सार्वजनिक याःगु चालु आर्थिक दँय चैत महिना तकया आर्थिक व वित्तीय प्रतिवेदनकथं गुलाया दुने स्वनिगलय् दकलय् अप्वः ८ दशमलव ५७ प्रतिशतं मूल्यवृद्धि जूगु खनेदगु खः ।
थ्व अवधि दुने तराई लागाय् ७ दशमलव ६८ प्रतिशत, पहाडी लागाय् ७ दशमलव १ व हिमाली लागाय् ७ दशमलव ४७ प्रतिशत मूल्यवृद्धि दु ।
वंगु आर्थिक दँय् थ्व हे अवधि दुने स्वनिगलय् ६ दशमलव २५ प्रतिशत मूल्यवृद्धि दुगु खः । अथे हे तराईलय् ७ दशमलव ६१ प्रतिशत, पहाडय् ७ दशमलव ७९ प्रतिशत व हिमालय् ८ दशमलव २५ प्रतिशत मुद्रास्फिति दुगु खः । थुगु आर्थिक दँया स्वंगूगु त्रैमासिक अवधितकया दुने मूल्यवृद्धिं वाञ्छित सीमातकं हाचां गाःगु राष्ट्र बैंकया प्रतिवेदनय् न्ह्यथनातःगु दु । अर्थात सरकारं तःगु मूल्यवृद्धिया सीमा स्वयां नं अप्वः मूल्यवृद्धि खनेदुगु दु ।
चालु आर्थिक दँया निंतिं सरकारं मूल्यवृद्धि ७ प्रतिशतया सीमा दुने कायम यायेगु लक्ष्य कयातःगु खः । तर चैत महिनाय् वार्षिक विन्दुगत उपभोक्ता मुद्रास्फिति ७ दशमलव ७६ प्रतिशत थ्यंगु दु । थ्व स्वयां न्ह्यःया दँय् थ्व हे मसहनाय् थज्याःगु मुद्रास्फिति ७ दशमलव २८ प्रतिशत बराबर दुगु खः ।
थ्व अवधिइ खाद्य तथा पेय पदार्थया मूल्यवृद्धि ६ दशमलव ९३ प्रतिशत व गैर खाद्य तथा सेवा क्षेत्रया मूल्यवृद्धि ८ दशमलव ४२ प्रतिशत दुगु खः ।
खाद्य तथा पेयपदार्थ समूह अन्तर्गत रेष्टुराँ, होटल उपसमूयह वार्षिक विन्दुगत मूल्य सूचकांक १४ दशमलव ६८ प्रतिशतं थहां वंगु दुसा मरमसलाया १४ दशमलव ६७, खाद्य व खाद्यजन्य पदार्थया १३ दशमलव ७२, सिसाबुसाया ११ प्रतिशत व सूर्तिजन्य पदार्थया १० दशमलव८३ प्रतिशतं थहां वंंगु दु ।
LEAVE YOUR COMMENTS