बोटलर्स नेपालयात आइक्यानया सिरपाः

येँ – नेपाल चार्टर्ड एकाउन्टेन्स अफ नेपाल (आइक्यानं) कोकाकोला नेपालया बोटलिङ पार्टनर बोटलर्स नेपाल लिमिटेडयात बेस्ट प्रिजेन्टेड एनुअल रिपोर्ट अवार्ड २०१८ या रनर अप अवार्ड लःल्हाःगु दु ।आइक्यानं दँय्दसं दकलय् बांलाःगु वार्षिक रिपोर्ट न्ह्यब्वःगु कम्पनीयात थुगु अवार्डं सम्मानित याना वयाच्वंगु दु ।

थुगुसी रनर अपया अवार्ड त्याकूगु बोटलर्स नेपालं वंगु स्वदँ न्ह्यवनिसें थ्व अवार्ड त्याका वयाच्वंगु दु । बोटलर्सं सन् २०१५ य् सेकेन्ड रनर अप, २०१६ य् फस्ट रनरअप व २०१७ विजेताया पुरस्कार त्याकूगु खः ।

अवार्ड लःल्हानाकासें बोटलर्स नेपालं थःपिनि ज्यायात पारदर्शि यानाः कर्पोरेट गभर्नेन्स पालना यायेत प्रतिबद्धता दुगु खँ धाःगु दु । अर्थ मन्त्री डा. युवराज खतिवडां छगू समारोहया दथुइ बोटलर्स नेपालया फाइनान्स कन्ट्रोलर अशोक मण्डल व फाइनान्स म्यानेजर सुमित गोयलयात थ्व अवार्ड लःल्हानादीगु खः ।