विद्युत प्राधिकरणया लबः १४९ प्रतिशतं अप्वल

येँ – सरकारी स्वामित्वया संस्थान घाटाय् वनाः न्ह्याबलें सरकारया छ्यं स्यानाच्वनीगु जुयाच्वंगु इलय् नेपाल विद्युत प्राधिकरणं धाःसा मेमेगु संस्थानतय् तुलनाय् थःत हाकनं छक्वः अब्बल सावित यानाः क्यंगु दु । लिपांगु झिदँ निरन्तर घाटा नया वयाच्वंगु प्राधिकरणं आर्थिक दँ २०७२÷७३ निसें थःगु नाफाया यात्रायात निरन्तरता बिया वयाच्वंगु दु ।

प्राधिकरणं वंगु आर्थिक दँय् आव २०७३÷७४ या तुलनाय् १४९ प्रतिशत अप्वः खुद नाफा कमे याःगु दु । प्राधिकरणं वंगु आवय् न्ह्यगू अर्ब २० करोड खुद मुनाफा आर्जन याःगु खः । कुशल व सक्षम व्यवस्थापक दत धाःसा घाटाय् वनाच्वंगु संस्थां नं नाफा कमे यायेफइ धयागु उदाहरण हाकनं क्यनेत प्राधिकरण हाकनं छक्वः सफल जूगु दु ।

अथेहे प्राधिकरणं चुहावट नियन्त्रणय् नं थःत बल्लाक थनेहःगु दु । स्वंदँया तथ्यांक स्वयेबलय् प्राधिकरणया चुहावट निरन्तरत न्यूनिकरण पाखे न्ह्याः वनाच्वंगु दु । प्राधिकरणं वंगु आर्थिक दाय् विद्युत चुहावटयात १५.३२ प्रतिशतय् हयेत ताःलाःगु दु । गुगु थ्वयां न्ह्यवया आर्थिक दँय् २०.७८ प्रतिशत दुगु खः ।

आर्थिक दँ २०७२÷७३ य् कुल चुहावट २५.७८ प्रतिशत दुगु खःसा स्वदँया दुने १०.४६ प्रतिशतं कुहां वःगु दु । प्राधिकरणया वार्षिक उपलब्धि बारे जानकारी बीत मंगलवाः ऊर्जा, जलस्रोत तथा सिँचाइ मन्त्रालयय् ग्वसाः ग्वःगु पत्रकार सम्मेलनय् प्राधिकरणया कार्यकारी निर्देशक कुलमान घिसिङं चुहावट नियन्त्रणय् थ्यंमथ्यं दक्षिण एशियाली मुलुकया तुलनाय् थ्यंगु खँ कनादिल ।

‘दक्षिण एशियाली मुलुकय् थ्यंमथ्यं १० प्रतिशत चुहावटयात छगू मापदण्ड कथं कयातःगु दु । झी थ्यंमथ्यं थ्व मापदण्डय् थ्यनीगु अवस्था दु’ वय्कलं धयादिल, ‘चहाुवट म्हो यायेफुगु अवस्थाय् दु, चुहावट पनेत प्राविधिक सुधार यायेमाःगु जूगुलिं छुं ई काइ ।’चुहावट नियन्त्रणय् न्ह्यथनेबहःगु सफलता चूलाःगुलिं नं खुद नाफा अप्वयेकेत ग्वाहालि जूगु खः ।

प्राधिकरणं सरकारी ढुकुटीइ १५ अर्ब ५९ करोड दाखिला याःगु दु । प्राधिकरणं विद्युत पहुँचय् नं विस्तार यायेत्यंगु दु । थौंकन्हय् उत्पादन, प्रसारण व वितरणय् केन्द्री जुयाच्वंगु प्राधिकरणं विद्युतीयकरणयात प्राथमिकताय् तयातःगु दु । वंगु दँय् राष्ट्रिय प्रसारणय् आवद्ध ज ुयाः विद्युत उपभोग याइपिं जनसंख्या थ्यंमथ्यं ७८ प्रतिशत थ्यंगु प्राधिकरणं धाःगु दु ।

प्राधिकरणं वंगु आर्थिक दँय् आव २०७३÷७४ या तुलनाय् १४९ प्रतिशत अप्वः खुद नाफा कमे याःगु दु । वंगु आवय् न्ह्यगू अर्ब २० करोड खुद मुनाफा आर्जन याःगु खः ।

थ्व ल्याः थ्वयां न्ह्यवया आर्थिक दँया तुलनाय् १० प्रतिशतं अप्वः खः । थौंकन्हय् ४५ लाख छेँय्खा ग्रीडय् स्वायेधुंकूगु दु । प्राधिकरणं विद्युत उत्पादनय् नं निजी क्षेत्रया तुलनाय् थःत अग्रस्थानय् तयेत सफल जुयाच्वंगु दु । प्राधिकरणया उत्पादनया ब्व ३४ प्रतिशत, निजी क्षेत्रया २९ व आयात ३७ प्रतिशत दु ।

वंगु आर्थिक दँय् कूल न्हय्गू अर्ब ५५ करोड युनित मत उपलब्धता मध्ये प्राधिकरणया निगू अर्ब ५५ करोड युनिट, निजी उत्पादकया निगू अर्ब १९ करोड व आयात निगू अर्ब ८१ करोड युनिट दुगु खः । वंगु आर्थिक दँय् मत आयात यायेमाःगु खःसां वइगु आर्थिक दँय् मत निर्यात यायेफइगु अवस्थाय् थ्यंकगु लक्ष्य दुगु खँ कार्यकारी निर्देशक घिसिङं धयादिल ।

धमाधम जलविद्युत आयोजना क्वचाइगु अवस्थाय् थ्यंगुलिं सरकारं उत्पादित मत सितिकं वंके मबीत ऊर्जाया मेमेगु रुप विस्थापित याना यंकेगु रणनीति ज्वनाच्वंगु दु । पत्रकार सम्मेलनय् ऊर्जामन्त्री वर्षमान पुनं विद्युतीय उपकरणया छ्यलाबुला अप्वयेकेगु लिसें विद्युतीय सवारी साधन प्रयोगय् नं सरकारया ध्यान केन्द्रित दुगु खँ कनादिल ।

‘आः विद्युतीय भुतु छ्यलेत आग्रह यायेगु जुइ, सरकारं विद्युतीय सवारी छ्यलेगुयात हःपाः बियाच्वंगु दु’ वय्कलं धयादिल । विद्युतीय सवारी साधनयात लक्षित यानाः चार्जिङ स्टेशन संचालन सम्बन्धी कार्यविधि छन्हु निन्हु दुने हे क्वछिइगु खँ नं वय्कलं धयादिल । मन्त्री पुनं १ हजार मेगावाट देय् दुने् खपत जुइगु वातावरण दयेकेत सरकार केन्द्रीय जुयाच्वंगु खँ धयादिल ।

वंगु आर्थिक दँय् प्राधिकरणं निजी उत्पादकपाखें १४ अर्ब १३ करोडया मत न्याःगु खः । अथेहे २३ अर्ब ३ करोडया विद्युत आयात जूगु प्राधिकरणं धाःगु दु । थ्व अवधिइ प्राधिकरणं ३२ करोडया विजुली निर्यात नं याःगु दु । वंगु असारया लिपांगु वालय् मदिक्क वा व ःगु कारणं आन्तरिक उत्पादनय् वृद्धि व तराई क्षेत्रया डुबानया कारणं आन्तरिक खपट कम जूगुलिं थ्यंमथ्यं ५०० मेगावाट निर्यात जूगु खः ।

प्राधिकरणं प्रशारण व वितरणलाइन विस्तारय् नं बः बिउगु दु । वंगु आर्थिक दँय् ७५७ किलोमिटर प्रशारण लाइन निर्माण क्वचायेकाः ६०६ किलोमिटर सर्किट संचालनय् वःगु प्राधिकरणं धाःगु दु । अथेहे वितरण लाइनपाखे (३३ केभी व वस्वयां क्वय्) नं थ्यमथ्यं ९ हजार ७२२ सर्किट किलोमिटर निर्माण क्वचायेधुंकूगु दु ।

मन्त्री पुनं उत्पादनलिसें वितरण प्रणाली सुधार आःया लक्ष्य दुगु खँ धयादिल । उपभोक्ताया माग धाने यायेफइ कथं वितरण प्रणालीयात सुधार यायेगु वय्कःया धापू दु । नेपालय् खपत जुयाः अप्वः मत जःलाखmला देशय् मीगु आधार तयार जुइधुंकूगु खँ न्ह्यथँसें मन्त्री पुनं नेपाल, भारत व बंगलादेश स्वाइकथं त्रिदेशीय डेडिकेटेड लाइन निर्माण यायेगु ख ँ नं धयादिल ।

बंगलादेशय् विद्युत निर्यात यायेत निगुलिं देय्या सचिवस्तरय् सहलह जुयाच्वंगु खँ नं मन्त्री पुनं धयादिल ।प्राधिरकणं वंगु आथिृक दँय् रुग्न अवस्थाय् लानाच्वंगु ३८ गू आयोजना नं निर्माण क्वचायेकूगु दु । थीथी समस्याय् लानाः ताःई न्ह्यवनिसें दयेके मफयाच्वंगु रुग्ण मध्ये उत्पादनपाखे छगू, प्रसारणपाखे स्वंगू व वितरणपाखे ३४ गू आयोजना वंगु आर्थिक दँय् क्वचाःगु खँ मन्त्री पुनं धयादिल ।

त्रिशुली ३ ए (६० मेगावाट) व काबेली करिडोरलगायत ३८ गू रुग्न आयोजना थ्व अवधिइ दयेके क्वचायेकूगु खः । ज्या न्ह्याके मफुगु झिंस्वगू आयोजनाया ठेक्क सम्झौता रद्द यानाः पुनः ठेक्का प्रक्रिया शुरु यानागु खँ वय्कलं धयादिल । देय्न्यंकं दुगु थ्रीफेज मिटर व टिओडी मिटरयात स्मार्ट मिटरं प्रतिस्थापन यायेगु ज्या सुरु जुइधुंकूगु ख ँ नं कार्यकारी निर्देशक घिसिंगं धयादिल ।

प्राधिकरणं स्वनिगलय् सिंगल फेज मिटरया थासय् स्मार्ट सिंगल फेज मिटर जडान यायेगु ज्या सुरु यायेधुंकूगु दु । स्वनिगःयात ताररहित दयेकेत भूमिगत तार लायेगु ठेकेदार छनोट यानाः अन्तिम चरणय् थ्यनेधुंकूगु प्राधिकरणं धाःगु दु ।