विपक्षीतय् नं रणनीति न्ह्यात

येँ – प्रधान मन्त्री केपी शर्मा ओलीं थ्वहे वइगु वैशाख २७ गते प्रतिनिधिसभाय् विश्वासया मत कायेगु निर्णय यायेवं आः थःपिं गुकथं न्ह्याः वनेमाली धइगु बारे सहलह यायेत म्हिगः नेपाली कांग्रेसया सभापति शेरबहादुर देउवा व माओवादी केन्द्रया अध्यक्ष पुष्पकमल दाहालया दथुइ खँल्हाबल्हा जुल ।

सूत्रया कथं निम्ह नेतातय् दथुइ छघौत्या धइथें टेलिफोनय् खँल्हाबल्हा जूगु खः । सोमवाः बहनी कांग्रेसया पदाधिकारी बैठक लिपा देउवा व दाहाल दथुइ नापलायेगु ज्याझ्वः नं तयातःगु खः । तर कांग्रेसया बैठक स्थगित जुइवं वय्कःपिनि दथुइ टेलिफोनपाखें जक संवाद जूगु खः ।
टेलिफोन संवादय् प्रम ओलीं विश्वासया मत कायेत्यंगु कारण बारे विश्लेषण जूगु खँ धाःगु दु । उकथं हे लुम्बिनी प्रदेशय् खनेदुगु राजनीतिक संकटया विषयय् नं वय्कःपिनि दथुइ सहलह जूगु खः ।

खँल्हाबल्हाय् माओवादी केन्द्रया अध्यक्ष दाहालं थःपिंसं अविश्वासया प्रस्ताव दर्ता यायेगु नितिं बः बियागु इलय् देउवां अविश्वास व आशंका जक यानाच्वन, आः ओली थः हे विश्वासया मत कायेत न्ह्यचिला वल, उकिं आः थःपिनिगु रणनीति छु जुइमाः धकाः न्ह्यसः तयादीगु खँ धाःगु दु ।

लिसलय् सभापति देउवां पार्टीया पदाधिकारी बैठक च्वनाः अध्यक्ष दाहालं न्यंगु न्ह्यसःया लिसः मालेगु जुइ धकाः धयादीगु खँ सूत्रं धाःगु दु । दाहालं देउवायात निर्धक्क जुयाः ओलीया विकल्पया रुपय् न्ह्यज्यायेत इनाप यानादीगु खँ नं धाःगु दु ।

थ्वहे झ्वलय् जनता समाजवादी पार्टीं नं प्रम ओली विरुद्ध अविश्वासया पक्षय् मतदान याइगु खँ संघीय परिषदया अध्यक्ष डा. बाबुराम भट्टराईया स्वकीय सचिव रोशन पोखरेलं कनादीगु दु । म्हिगः ‘नेपालभाषा टाइम्स’ लिसे खँ ल्हासें पोखरेलं जसपां ओलीया विपक्षय् हे मत तइगु जानकारी बियादीगु खः ।

थौंकन्हय् जसपाया नेतात महन्थ ठाकुर व राजेन्द्र महतोपिंसं थः सांसदतय् हस्ताक्षर संकलन नं यानाच्वंगु दु, उकिया बारे कँसें पोखरेलं धयादिल, ‘खुम्ह नेतातय् बैठकं अविश्वासया प्रस्तावय् मत बीगु धकाः निर्णय यायेधुंकूगु दु, हस्ताक्षर संकलनया सम्बन्धय् वय्कःपिंसं आः गुकथं न्ह्याः वनेगु धकाः सहलह यायेत जक यानागु लिसः बियादीगुलिं अविश्वासया पक्षय्वय्कःपिं नं उखेथुखे वनीगु सम्भावना मदु ।’

जसपाया नेतात ठाकुर व महतो वर्तमान प्रधानमन्त्रीं थःपिनिगु मागयात सम्बोधन यात धाःसा ओली सरकारयात निरन्तरता बीमाःगु पक्षय् दुसा संघीय परिषदया अध्यक्ष डा. बाबुराम भट्टराई व मेम्ह अध्यक्ष उपेन्द्र यादव धाःसा प्रतिगमनया लँपुइ वंम्ह ओलीयात गुगुं नं कथं समर्थन याये फइ मखु धइगु पक्षय् दु ।

सम्बन्धित बुखँ

LEAVE YOUR COMMENTS