देउवा सरकारं दादागिरी क्यनाहःल– ओली

येँ – नेकपा एमालेया अध्यक्ष केपी शर्मा ओलीं नेपाली कांग्रेसया सभापति शेरबहादुर देउवा नेतृत्वया सरकारयात ‘प्रतिगामी’ या संज्ञा बियादीगु दु ।
वय्कलं प्रम देउवां दादागिरी क्यनेगु ज्या शुरु याःगु धासें न्हापां थःपिसं नियुक्त यानातइपिं कर्मचारीयात निष्कासन यायेगु ज्या दादागिरी हे जूगु द्वपं बियादीगु खः ।

म्हिगः जूगु छगू ज्याझ्वलय् न्ववायेगु झ्वलय् वय्कलं धयादिल, ‘दमन यायेगु ज्या जुइधुंकूगु दु, भद्दा राजनीतिकरण शुरु जुइधुंकूगु दु, थ्व सरकारया अलोकतान्त्रिक कास्टिङ जक खः, जिमिसं थज्याःगु फुक्कं खँया प्रतिवाद यायेगु जुइ अझ माल धाःसा प्रतिरोध यायेगु जुइ ।’

उकथं हे वय्कलं देउवाया सरकारयात समर्थन याःपिं थःगु पार्टीया नेता कार्यकर्तातय्त लक्षित यानाः धयादिल, ‘जिमिगु पार्टीया छुं स्यंपिं तत्वतय्सं यानाः प्रतिगामी सरकार दयेकेगु थुगु स्थिति वःगु खः, देउवाया प्रतिगामी सरकार निष्ठा त्वःताः दक्षिणपन्थी लिसे जानाच्वंगु दु, अले छुं स्वार्थी नेताया कारणं नेकपा तज्याःगु दु ।’

अध्यक्ष ओलीं अनुशासनहीन व अराजकतां हे नेकपा तज्याःगु धासें थःगु हे पार्टीया नेतृत्वया सरकार क्वःथःगु द्वपं बिसें अज्याःपिनिगु पाखें आन्दोलन न्ह्यःने न्ह्याकेमफइगु खँ नं धयादीगु दु ।

सम्बन्धित बुखँ

LEAVE YOUR COMMENTS