न्याद्वःम्हेसिया निःशुल्क स्वास्थ्य परीक्षण

यल – सम्झना ल्याबोरेटरी क्लिनिकं नीन्हुयंकंया स्वास्थ्य परीक्षण अभियान आइतवाःनिसें न्ह्याकूगु दु । ‘ल्वचं कये धुंकाः मखु, ल्वय् मजुइकेया निंतिं स्वास्थ्य परीक्षण यायेनु’ धइगु नारालिसें शुरु जूगु अभियानया उलेज्या यल महानगरपालिकाया उपमेयर गिता सत्यालं यानादीगु खः ।

ल्याबोरेटरीया परिसरय् जूगु ज्याझ्वलय् संस्थाया अध्यक्ष उर्दीप जोशीं स्वास्थ्य सम्बन्धी सोचय् हिउपाः वयेमाःगु आवश्यक दुगु खँय् बः बियादिसें ल्वचं कये स्वयां न्ह्यः हे स्वास्थ्य परीक्षण यायेगु उपयुक्त जुइगु सन्देश बीत परीक्षण अभियान न्ह्याकागु जानकारी बियादिल ।

थनिं छगू दशक न्ह्यः ‘च्व जांचे याकादिसँ, जँलास्यें बचे यानादिसँ’ धइगु नारा बियाः अभियान न्ह्याकूगु सम्झना ल्याबोरेटरीं उकियात हे निरन्तरता बीकथं थ्व अभियान न्ह्याकूगु खःसा अभियानया झ्वलय् करिब न्याद्वःम्हेसिया निःशुल्क स्वास्थ्य परीक्षण यायेगु लक्ष्य कयातःगु दु ।

नीन्हुया अभियानया झ्वलय् क्लिनिकं थाइराइड फंग्सन टेस्ट, चिनील्वय्, डक्टर कन्सुलेसन, ब्लड सुगरया निःशुल्क परीक्षण नापं होल बडी प्याकेज चेकअपय् ५० प्रतिशत छ्यापं बीगु जूगु दु । लिसें यल मनपापाखें सामाजिक सुरक्षा भत्ता कयाच्वंपिं ज्येष्ठ नागरिक, विकलांग, क्यान्सर, अंग प्रत्यारोपण व डाइलसिसया ल्वगियात नेपालय् जुइगु ल्याब परीक्षणय् ५० प्रतिशत छ्यापं बीगु क्लिनिकं जानकारी बिउगु दु ।

विदेशय् परीक्षण यायेमाःसां नं १५ प्रतिशत छ्यापं बीगु क्लिनिकया ग्वसाः दु । थुकिया नापनापं एक्सरे, एमआरआई, युएसजी ईको आदि परीक्षणय् २५ प्रतिशत छ्यापं बीगु जूगु दु । यल मनपाया उपमेयर सत्याल व १६ वडाअध्यक्ष निर्मलरत्न शाक्यं अभियानया सफलताया कामना यानादीगु ज्याझ्वलय् क्लिनिकया संस्थापक श्यामादेवी जोशीयात सम्मान याःगु खःसा वरिष्ठ संचारकःमि कृष्णा ताम्राकारयात मतिनाया चिं लःल्हाःगु खः ।