सेन्ट जेभियर्सय् महानगरं भर्ना पना बिल

यल (नेपालभाषा टाइम्स)- यल महानगरपालिकां जाउलाख्यलय् च्वंगु सेन्ट जेभियर्स स्कुलय् विद्यार्थी भर्ना पना बिउगु दु । स्कुलं संवैधानिक व कानुनी आधारय् भर्नाया नितिं कोटा निर्धारण मयाःगु धासें भर्ना प्रक्रिया पनाबिउगु खः ।

यल मनपाया प्रमुख प्रशासकीय अधिकृतं सेन्ट जेभियर्सया कर्मचारी व जेसिट सोसाइटीया मनूतय् परिवारया विद्यार्थी भर्ना यायेधुंकाः ल्यं दुगु सिटय् जक कोटा क्वःछिनाः ‘लट्री’ याःगुलिं उकियात पनेमाःगु खँ धाःगु दु ।

नेपाल जेसिट सोसाइटी अन्तर्गत न्ह्यानाच्वंगु शैक्षिक संस्थाय् ज्या याइपिं मनूतय् छेँजःपिंत अप्वः मौका बीगु व सर्वसाधारण जनताया मस्तय्सं म्हो जक कोटा काये दइगु अवस्था चीकाः न्यायपूर्ण विधि नालेत स्कुलयात धयागु खँ प्रशासकीय अधिकृत गणेश अर्यालं कनादीगु दु । सेन्ट जेभियर्सय् मस्त भर्ना यायेबलय् न्यायपूर्ण अवस्था दयेकेगु नितिं तत्काल भर्ना प्रक्रिया पनेत पत्राचार यानागु खँ नं वय्कलं कनादिल ।

सेन्ट जेभियर्सं पुलांपिं विद्यार्थीया मस्तय्त १० प्रतिशत, ब्वनाच्वंपिं मस्तय् किजा केहेँपिंत १० प्रतिशत, यल मनपा ४ नम्बर वडाया विद्यार्थीयात ५ प्रतिशत व यल महानगर दुनेया विद्यार्थीयात १० प्रतिशत कोटा क्वःछिनातःगु दु । थ्वयां लिपा ल्यं दनिगु सिटय् जक खुला ‘लट्री’ यानाः भर्ना कायेगु यानाच्वंगु खँ नं प्रशासकीय अधिकृत अर्यालं कनादीगु दु ।