छत्रपाटी चिकित्सालयया ६७ क्वःगु बुन्हि हन

येँ (नेपालभाषा टाइम्स)- छत्रपाटी निःशुल्क चिकित्सालयया ६७ क्वःगु वार्षिकोत्सव मंगलवाः क्वचाल । वार्षिकोत्सवय् प्रतिनिधि सभाया सांसद व पुलांम्ह उपप्रधानमन्त्री प्रकाशमान सिंह मू पाहाँ व येँ महानगरपालिकाया प्रवक्ता व १७ वडाया अध्यक्ष नवीन मानन्धरया पाहाँ कथं झायादीगु दु ।

चिकित्सालयया अध्यक्ष मनोजमान श्रेष्ठया सभपातित्वय् जूगु ज्याझ्वलय् न्ववासें मू पाहाँ सिंहं चिकित्सालयया इतिहास लुमंकुसें सेवा यायेगु भावनां हे थुगु चिकित्सालय चायेकूगु खँ न्ह्यथनादिल । अथेहे पाहाँ मानन्धरं चिकित्सालयं सुरुं निसें हे गरिब असहायपिंत सेवा याना वयाच्वंगु खँ न्ह्यथँसें चिकित्सालयया विकासया निंतिं थः न्ह्याबलें लगे जुयाच्वनेगु खँ कनादिल । ज्याझ्वलय् अध्यक्ष श्रेष्ठं छत्रपाटी निःशुल्क चिकित्सालयया सेवा विस्तारव भविष्यय् यायेगु ज्या बारे कनादीगु खः ।

समारोहय् चिकित्सलयय् ३० दँ, २५ दँ व झिदँ सेवा याःपिं व उत्कृष्ट कर्मचारीतय्त सम्मान नं याःगु खः । ३० दँ सेवा याःपिं कर्मचारी विमल पन्त, मञ्जुश्री बसी, सुशीला मानन्धर, सविता राय, कृष्ण महर्जनयात प्रशंसापत्र व अवकास पत्र लःलहाःगु खःसा २५ दँय सेवा याःपिं अम्बिका नेपाली, शर्मिला देवकोटायात, अथेहे झिदँ सेवा याःपिं चर्मतथा यौन रोग विशेषज्ञ डा. सञ्जय शाक्य, कर्मचारीपिं कुलबहादुर गुरुङ, खड्ग बहादुर थापामगर, रिता भट्ट, मन्दिरा शाही, किशोर मगिया, रंगिना महर्जन, न्यादँ स्वायं अप्वः सेवा याःपिं स्टाफ नर्सपिं देवी गुरुङ, सन्जु मास्के, कल्याणी पोडे, इना वज्राचार्य, मेनुका मग्रराती, सविता रोक्का, सृजना रानाभाट िलसे) त्कृष्ट कर्मचारी प्रकासकीय अधिकृत मिनु जोशी, ड्रेसर राजकुमार थापायात प्रसंशापत्र लःल्हाःगु खः । अथेहे चिकित्सालययात ग्वाहालि याना वयाच्वनादीम्ह नवीन चित्रकारयात नं सम्मान याःगु खः ।

समारोहय् चिकित्सालयया निर्माणाधिन माउ बद्री भवनया निंतिं बबि बिमोली व निला खड्का बिमोलीं न्हय्गू लाख चन्दा, अथेहे अबु गंगासागर श्रेष्ठ व मां बिकुमाया श्रेष्ठया नामं काय कृष्णसागर श्रेष्ठं न्हय्गू लाख चन्दा बिउगु खः ।

कुमारदेव मानन्धरं लसकुस याःगु ज्याझ्वलय् मेडिकल डाइरेक्टर डा. सन्तोष मानन्धरं चिकित्सालयय् जूगु सुधारया बारे खँ तयादीगु खः ।