प्रतिस्पर्धाया नामय् ठगी जुयाच्वंगु दावी

यल- नेपाल टेलिभिजनपाखें प्रशारण जुयाच्वंगु रियालिटी शो ‘नेपाल गोल्डेन आइडल–सिजन ६’या फाइनलतक थ्यनाः नं उगु प्रतिस्पर्धा दथुइ हे त्वःतूम्ह प्रतिस्पर्धी स्रजल महर्जनं थम्हं उगु प्रतिस्पर्धा दथुइ हे त्वःतेमाःगु कारण बारे छगू पत्रकार सम्मेलन यासें जानकारी बिउगु दु ।

एनटिभी–२ पाखें हरेक विहीवाःपतिकं बहनि व गोल्डेन स्टार टिभी अनलाइनपाखें प्रशारण जुयाच्वंगु उगु शोया टप–६ तक थ्यनाः नं दथुइ त्वःतेमाःगु कारण प्रतिस्पर्धाया नामय् ठगी यायेगु प्रवृत्ति हावी जूगुलि खः धकाः प्रतिस्पर्धा स्रजलं धाःगु दु ।

शोया अन्तिम खुगूगु थासय् तक थ्यनेत सफल वय्कःलिसें मेपिं प्रतिस्पर्धीतय्त आयोजकं बिउगु न्यासः स्वयां च्वय्या टिकट मी माःगु, नियमकथं प्रतिभा प्रस्तुत यायेगु मौकापाखें बञ्चित याःगु, प्रतिस्पर्धीया दथुइ ब्वःबीगु व म्हुतु ल्हायेगु जक मखसे स्वनिगः दुने, चितवन, इटहरी लगायत थीथी थासय सांगीतिक यात्राय् यंकूगु इलय् नके त्वंके तकं मबिउगु धासें थम्हं शोलय् निरन्तरता मबीगु निष्कर्षय् थ्यंगु वय्कलं धयादिल ।

सांगीतिक यात्राया झ्वलय् गुगु थाय्या प्रतिस्पर्धी खः, वं हे उगु थासय् जुइगू दक्वं व्यवस्थापन व आवश्यकतातकं पूर्ति यायेमाःगु शर्त ग्वसाः खलकं तयेवं अभिभावकयात थुकिं तनाव जूगु स्रजलया अबु सुरोज महर्जनं कनादिल ।

सुरशाला आइडलपाखें चर्चाय् वःम्ह स्रजलयात वयागु प्रतिभा खनाः वं अध्ययन यानाच्वंगु ज्ञान निकेतन स्कुलपाखें वःगु प्रस्तावकथं निला स्वलाया अवधिइ तःगू चरणय् जूगु प्रतिस्पर्धाया निंतिं थःगु हे खर्चय् पोखरा वनागु व थ्व अवधिइ थः तसकं प्रताडित जुइमाःगु धासें लिपांगु इलय् सह यायेगु शक्ति हे मदयाः तसकं अन्याय जूगुलिं थःपिंसं शो दथुइ हे त्वःतेगु निर्णय यानागु स्रजलं धयादिल ।

थम्हं प्रतिस्पर्धालिसे असन्तुष्टि जुयाः मखसे ग्वसाः खलकं रियालिटी शोया नामय् सहभागितय्त यानाच्वंगु शोषण व मात्र ध्यबा हे जक सकतां तायेकूगुलिं मानसिक तनाव जूगु धासें थज्याःगु प्रवृत्ति अप्वया मवनेमा धकाः शो त्वःताःगु स्रजलं धाःगु दु ।

प्रतिभा स्वयां नं टिकट अप्वः मिउगु लिधंसाय् अंकया गणना जुइगु खँ धाःगुलिं शुरु शुरु दुहां वयाः टिकट मिउपिं गुलिखे प्रतिस्पर्धी आः शो नं पिहां वनेधुकूधासें थुकथं जबरजस्ती टिकट मीगु ज्या आयोजकया ठगी खः कि मखु धकाः वय्कलं न्ह्यसः थनादीगु दु ।

सम्बन्धित बुखँ

LEAVE YOUR COMMENTS