ने. सं. ११४६ बछलागा चौथी -

चित्तधरया छेँ आः पूवंक हे थुनाः दनीगु

येँ – तःभुखाचं क्षति याना बिउगु नेपालभाषा परिषद्या छेँ आः नेपाःस्थित भारतीय राजदूतावासं दयेका बीगु जूगु दु । दूतावासपाखें आः थ्व छेँ पूवंक हे थुनाः हानं जगंनिसें दनेत्यंगु खः ।

कविकेशरी चित्तधर हृदय च्वनादीगु थ्व छेँ सछिदँ स्वयां पुलां जुइधुंकल । लिसें थ्व उगु ईया तुलाधरपिनि मौलिक शैलीं दनातःगु छेँ जुयाः थुकिया पुरातात्विक महत्व समेत दुगु खँ धाःगु दु । अय् जुयाः थ्व छेँया नक्सा समेत पुरातत्व विभागं दयेका बिउगु खः । छुं ई न्ह्यः तिनि भारतं वःपिं इन्जिनीयरतय् छगू पुचलं थ्व छेँ निरीक्षण याःगु खः । थ्व छेँय् चित्तधरया थीथी हलंज्वलं मुंकाः म्युजियम समेत चायेकातःगु जुयाः थुकिया पुनर्निर्माण विशेष कथं यायेमाःगु खँ धाःगु दु ।

भारतीय दूतावासं नेपाः सरकारया अनुमति कयाः भुखाचं क्षति जूगु १२ गू सम्पदा दयेकेगु ग्वसाः ग्वःगुली छगू थ्व नं लाःगु खः ।