वीर अस्पतालया भवनं न्हूगु द्यःछेँयात खतरा

येँ- वीर हस्पिटलं थःपिनि न्हूगु सर्जिकल भवन दयेकेगु झ्वलय् अन नापसं च्वंगु द्यःछेँयात लिच्वः मलाइकथं संरचना दयेकेगु निर्णय जूगु दु । उगु द्यःछेँ थनया जनबहाः द्यःया न्ह्यःने च्वंगु लुँचुभुलु अजिमाया द्यःछेँ खः ।

म्हिगः येँ मनपा २७ वडाया वडाध्यक्ष समेत च्वनाः जूगु सहलहय् वीरया भिसी गणेश गुरुङं उगु प्रतिवद्धता प्वंकादीगु खः । द्यःछेँ स्वयां स्वंगू मिटर तापाक जक सर्जिकल भवन दयेकेगु निर्णय जूगु खँ द्यःछेँया गुथियार राम महर्जनं ‘नेपालभाषा टाइम्स’ यात कनादिल ।
वंगु निदँ न्ह्यवंनिसें पुनर्निर्माण जुयाच्वंगु द्यःछेँया लिकसं च्वंगु वंगल सिमायात स्काभेटर साल काःबलय् द्यःछेँ हे दुनी थें च्वनेवं बिहीवाः अन निर्माण ज्या हे दिकागु खँ वय्कलं कनादिल । वयां लिपा येँ मनपाया मेयर विद्यासुन्दर शाक्यं अस्पताल प्रशासनयात सःताः म्हिगः सहलह याके बियादीगु खः ।

वीर अस्पतालं अन सर्जिकल भवन दयेकेगु निंतिं ३५ फिट गाः म्हुइवं उगु लागाय् च्वंगु च्याखा झिखा छेँय्चर्के जूगु खँ नं स्थानीय जनतां धाःगु दु । छेँ चर्के जूपिं पीडिततय्सं अस्पताल प्रशासनयात धाःवंबलय् खँ तकं मन्यंगु खः । लिसें उगु थासय् न्हापा धः दुगु खःसा आः भवन दयेकेगु झ्वलय् उगु धः नं बन्द याःगुलिं थःपिंत समस्या जुयाच्वंगु खँ नं स्थानीय जनतां धाःगु दु ।

वीरया भिसी गुरुङं अन धः मदु धकाः सुरुइ दावी यानादीगु खः । तर २७ वडाया अध्यक्ष चिनियाँमान वज्राचार्यं अन न्हापांनिसें धः दु धकाः थुइका बीवं आः अन धः नं कायम यायेत नं वीरया प्रशासन सहमत जूगु दु । आः जूगु सहमति कथं अस्पताल प्रशासनं ज्या मयात धाःसा अन हाकनं ज्या पने मालीगु ख्याच्वः नं स्थानीय जनतां बिउगु दु ।