ललिता निवासया रिपोर्ट लःल्हात

येँ (नेपालभाषा टाइम्स)÷ बालुवाटरस्थित ललिता निवासया १४३ रोपनी सरकारी जग्गा हिनामिना याःगु सम्बन्धी काण्डया अनुसन्धान क्वचायेकाः प्रहरीया केन्द्रीय अनुसन्धान ब्युरो (सिआईबीं) राय सहित अनुसन्धान प्रतिवेदन सरकारी वकिलया ज्याकुथिइ लःल्हाःगु दु ।

सरकारी लिखत किर्ते व संगठित अपराधया कसुरय् ५७ न्हु तक अनुसन्धान यानाः ब्युरो २०० स्वयां अप्वःसित मुद्दा तयेगु कथं सिफारिस यानाः थःपिनि रायसहितया प्रतिवेदन बुझे याःगु खः ।

थ्व प्रकरणय् प्रहरीं पुलांपिं प्रधानमन्त्री माधव नेपाल व डा. बाबुराम भट्टराईयाके समेत बयान काःगु खःसा वय्कःपिंत साक्षीया रुपय् दुथ्याकाः प्रतिवादी दयेकेगु सिफारिस याःगु मदु । प्रहरीं ललिता निवास प्रकरणय् पुलांम्ह मन्त्रीं लिसे कांग्रेस नेता विजयकुमार गच्छेदार, पुलांम्ह मन्त्री चन्द्रदेव जोशी, पुलांम्ह राज्यमन्त्री सञ्जय साहयाके बयान कायेधुंकूगु दुसा पुलांम्ह मन्त्री डम्बर श्रेष्ठ धाःसा बिसिउँ वनाच्वंगुलिं बयान काये मफुनिगु खँ सीआईबीं धाःगु दु । थुपिं प्यम्हं मन्त्रीयात धाःसा सीआईबीं प्रतिवादी दयेकूगु दु ।

सीआईबीं ललिता निवासया जग्गा प्यक्वः तक व्यक्तिं थःगु नामय् हःगु निष्कर्ष सहित प्यंगू बिस्कं बिस्कं रायसहित प्रतिवेदन बुझे याःगु खः । मुद्दा नम्बर २४ स ११२ रोपनी ४ आना १ पैसा जग्गा हिनामिना जूगु निष्कर्ष सहित २०९ म्हेसित ज्वनेत पक्राउ पुर्जी नं काःगु खः ।

उकथं हे मुद्दा नम्बर २५ स नक्कली पशुपति टिकिन्छा गुथि दयेकाः ४ रोपनी १४ आना २ पैसा २ दाम जग्गा हिनामिना याःगु निष्कर्ष प्रहरीं पिकाःगु दु । उकी ११० म्ह दुथ्याःगु प्रहरीया निष्कर्ष दु । उगु हे आधारय् प्रहरीं ११० म्हेसित ज्वनेगु लागिं पक्राउ पुर्जी काःगु दु ।

अथे हे मुद्दा नम्बर २६ स छुट जग्गा दर्ता यायेगु नामय् १२ आना २ पैसा जग्गा हिनामिना जूगु प्रहरीया धापू दु । उगु प्रकरणय् झिंस्वम्ह दुथ्याःगु निष्कर्ष प्रहरीं पिकाःगु दु । मुद्दा नम्बर २७ स बालुवाटारया विशिष्ट व्यक्तितय्सं निवासया जःखः विस्तार यायेगु नितिं सट्टापट्टा व सोधभर्नाया नामय् २५ रोपनी ७ आना १ पैसा १ दाम जग्गा हिनामिना जूगु प्रहरीया निष्कर्ष दु । उकी ७४ म्ह मनूत दुथ्याः ।

सीबीआईं तयार याःगु प्रतिवेदनय् जग्गा लित बिउपिनिगु हकय् धाःसा मुद्दा न्ह्याकेम्वाःगु निष्कर्ष नं पिकाःगु दु । एमाले नेता बिष्णु पौडेलं नं ललिता निवासया जग्गा न्याना तःगु प्रमाण लुया वःगु खःसां वय्कलं जग्गा लित बीगु धाःगुलिं वय्कःयात कारवाही मयायेगु निर्णय जूगु खः ।

ललिता निवासया थ्व काण्डय् अनुसन्धान यानाः प्रतिवेदन दयेकेगु ज्या सीआईबीया निर्देशक लिसें प्रहरीया अतिरिक्त महानिरीक्षक (एआईजी) किरण वज्राचार्य नेतृत्वया पुचलं याःगु खः ।

सम्बन्धित बुखँ

LEAVE YOUR COMMENTS