
येँ (नेपालभाषा टाइम्स) – कोरोना भाइरसया संक्रमण लिपा सरकारं घोषणा याःगु लकडाउनया इलय वंगु २०७२ सालया तःभुखाचं ध्वस्त जूगु छुंं छुं सम्पदा दयेकेगु ज्या धाःसा न्ह्यानाच्वंगु दु ।
सरकारं वंगु चैत ११ गते लकडाउन घोषणा यायेधुंकाः दिनाच्वंगु पुनर्निमाण ज्या आः हाकनं शुरु जूगु दु । थ्वहे झ्वलय् येँया नांजाःगु मरु सतः पुनर्निर्माणया ज्या नं न्ह्याःगु दु ।
वंगु वैशाख २१ गते आइतवाः निसें मरु सतः दयेकेगु ज्या न्ह्याःगु अन ज्या यानाच्वंम्ह छम्ह ज्यामिं ‘नेपालभाषा टाइम्स’ यात जानकारी बिउगु दु । उम्ह ज्यामिया कथं ज्यामि, दकःमि व सिकःमि यानाः न्हिं झिंन्याम्हेस्यां निरन्तर रुपं ज्या यानाच्वंगु दु ।
लकडाउनया इलय् दकःमि व सिकःमिंत हयेगु निंतिं येँ महानगरपालिकां गाडिया व्यवस्था यानाबिउगु खँ नं अन ज्या याइपिंसं जानकारी बिउगु दु । दकःमि व सिकःमि अप्वः यानाः ख्वपयापिं जूगुलिं गाडि छ्वयाः उमित हयेगु यानाच्वंगु खः ।
उकथं हे येँया क्वने लागाय् लाःगु जोशी देगः दयेकेगु ज्या नं न्ह्यानाच्वंगु दु । अन नं झिम्ह स्वयां अप्वः दकःमि व सिकःमिपिंसं देगः दयेकेगु ज्या यानाच्वंगु खः ।
LEAVE YOUR COMMENTS