ने. सं. ११४४ कौलाथ्व तृतीया -

भ्यू टावर – जनताया सः न्यनेमाः

वि.सं. २०७२ सालय् ब्वःगु भुखाचं स्यंकूगु सम्पदा पुनर्निर्माणया खँ चर्चाय् दुबलय् येँ सहरया दथुइ जुयाच्वंगु भ्यूटावरया नवर्निर्माणया खँ लिउने लानाच्वंगु दु । सहरया दथुइ येँ महानगरपालिकाया हे पहलय् आः दयेकेगु ज्या जुयाच्वंगु २१ तल्लाया भ्यू टावर वास्तविकरुपं येँदेय्या जनताया हितया निंतिं खः वा सुयागुं निहित स्वार्थ पूवंकेत येँ सहर अझ अव्यवस्थित यायेत दयेकेत्यंगु खः धयागु खँ इलं न्ववाइ हे तिनि ।

येँ सहरया दथुइ २१ तल्ले भ्यू टावर निर्माणया आवश्यकता गुलि खः धयागु खँ अझं सहर ब्यवस्थित यायेत नीस्वनातःगु निकायं प्रमाणित याये मफुनि । थ्व भवन निर्माण अति हे अनुपयुक्त धयागु खँया अनेक चर्चा विज्ञपिनिगु दु । वातावरणविद्तय्गु धापूकथं थुगु भवन निर्माणं सहरया वातावरण हे नष्ट याना बीगु दावी जुयाच्वंगु दु ।

थुगु भवन निर्माणया निंतिं हे अनया चले जुयाच्वंगु बस पार्कयात तिंख्यलय् सारे यानाः चले यानाच्वंगु दँ दँ दयेधुंकूगु दु । तर भ्यू टावर निर्माणया विवादयात कयाः नं अन भ्यू टावर दयेकेगु वा मदयेकेगु धयागु निर्णय न सम्बन्धित निकायं यायेफुगु दु, न अन अव्यवस्थितकथं न्ह्यानाच्वंगु तिंख्यःया बस पार्कयात ब्यवस्थित यायेगु कुतः हे सुनां नं याःगु खनेदु ।

थुज्वःगु अव्यवस्थाया कारणं स्वनिगःया हे वातावरण स्यना वनाच्वंगु दु । सहर दथुइ हे बस पार्क दयाच्वंगु कारणं लःफय् दुषित व प्रदूषित जुयाच्वंगु दु, सहर न्हियान्हथं धुलं गायाः आम जनता ल्वगि जुयाच्वंगु दु । तर सम्बन्धित निकायं थुखेपाखें चिउताः कयाच्वंगु खनेमदु ।
छगू इलय् थ्व भ्यू टावरया निर्माण पनेगु निंतिं आन्दोलन हे न्ह्याःगु खः ।

जनतायात जुइगु असुविधायात पूर्णरुपं वेवास्ता यानाः येँ महानगरपालिकाया कर्मचारीतय्सं न्ह्याकाच्वंगु इलय् थुगु भ्यू टावरया निर्माण प्रक्रिया न्ह्याकूगु खः । जनप्रतिनिधित स्थानीय निकायय् मदुगु इलय् फुक्क हे राजनीतिक पार्टीतय्सं थःपिनि जनप्रतिनिधित स्थानीय निकायय् थ्यन धाःसा थुगु अनुपयुक्त भवन निर्माण दिके बीगु धकाः उगु इलय् जूगु निर्वाचनया मुद्दा तकं दयेकेगु खः ।

छगू इलय् थ्व भ्यू टावरया निर्माण पनेगु निंतिं आन्दोलन हे न्ह्याःगु खः । जनतायात जुइगु असुविधायात पूर्णरुपं वेवास्ता यानाः येँ महानगरपालिकाया कर्मचारीतय्सं न्ह्याकाच्वंगु इलय् थुगु भ्यू टावरया निर्माण प्रक्रिया न्ह्याकूगु खः ।

जनतां पत्याः यानाः राजनीतिक पार्टीया उम्मेदवारतय्त मतदान नं याःगु खः । तर विडम्बना धायेमाः अज्याःपिं मनूत जनप्रतिनिधि जुयाः सत्ताय् थ्यन, अझ सुं सुं ला मन्त्री तकं जूवन, तर अनया भ्यू टावरया ज्या दिकेगु खँ लिपा गबलें न्ह्यथनेगु मजुल । मेखेर उगु भ्यू टावरया ठेक्का काःम्ह ठेकेदार अनेककथंया विवादय् नं वल ।

तर नं उम्ह ठेकेदारयात चीकेगु खँ धाःसा मवल । सत्ताय् दुपिनिगु शक्ति प्रयोगया कारणं आः हाकनं उगु भ्यू टावर निर्माणया ज्या न्ह्यानाच्वंगु समाचार पिदनाच्वंगु दु । तर व फुक्कं येँ महानगरपालिकानाप जूगु सहमति व सम्झौताया लिधंसाय् जुयाच्वंगु खः कि मखु धयागु खँय् आम जनता अनभिज्ञ तिनि ।

थुगु प्रकरणय् दकले मू वंगु न्ह्यसः धयागु येँ सहरया दुने २१ तल्लाया भ्यू टावर निर्माण आवश्यक खः कि मखु ? मुलुक संघीयताय् न्ह्याः वनेधुंकाः थुकिया निर्णय स्थानीय निकायं याइगु खः । अझ थ्व ला येँ महानगरपालिकाया हे पहलय् दयेकाच्वंगु भवन खः । तर थ्व भवनं येँ देय्या जनतायात गुकथं प्रभाव लाकी धयागु अध्ययन, प्रतिवेदन सार्वजनिक जुयाच्वंगु मदु ।

बस पार्क लिक्क छेँ बुँ दुपिं सरोकारवालातय्सं थपाय्जाःगु भवन निर्माणया निंतिं म्हूगु जगया कारणं हे अन लः सुना वंगु धाःगु दु । लिक्क लानाच्वंगु छेँ, टहराया जग व अंगः प्रभावित जुयाच्वंगुयात कयाः न्हिथं धइथें सम्बन्धित वडाय् उजुरी दर्ता जुयाच्वंगु दु, तर अय्नं सम्बन्धित आधिकारिक निकाय मौन जुयाच्वंगु दु ।

येँ महानगरपालिकाय् जनप्रतिनिधि मेयर व उपमेयर थुगु भ्यू टावर निर्माणया खँय् सकारात्मक मदु । थुगु भ्यू टावरया निर्माणं अनया सम्पूर्ण वस्तीयात हे लिच्वः लाइगु निश्चित दु । मात्र छगू उदाहरणकथं उगु भवन निर्माण लिपा अन न्हिं १ लाख लिटर लः उगु भवनयात आवश्यक जुइगु तथ्याङ्क दु । व लः गनं आपूर्ति जुइ धायेबलय् अन जमिनं लः सालेगु बाहेक मेगु उपाय मदु ।

उकथं अन डिप बोरिंग जुइबलय् अनया वस्ती दुने लःया हाहाकार जुइगु निश्चित दु । थुकिं अनया स्थानीयवासीतय्त जुइगु लिच्वःया आंकलन अझं मदु । मेखे उगु २१ तल्ला दुगु भवनय् वये–वने जुइगु यातायात साधनया प्रवेश व निकास गनं ? अनया वर्तमान सतकया स्थिति उलि यातायात साधनयात ब्यवस्थित यायेगु क्षमता मदु ।

थुकिया हे कारणं थ्व लागाय् २४ सै घण्टा यातायात जाम जुइवं येँदेय्या सम्पूर्ण यातायात ब्यवस्था हे प्रभावित जुइगु निश्चित दु । गन तक आःया इलय् थुगु भवन निर्माणया निंतिं जनस्तरया विरोध न्हापा थें खने मदु धयागु चर्चा दु, जनतां विरोध याःसा जक हे थुकिया निर्माण दिके फइ धयागु लंगडा तर्क दु, थ्व जनतायात सरासर भ्रमय् तयेगु ज्या खः ।

येँ सहरयात गुकथं कालान्तरय् तक ब्यवस्थित याना तये फइ धयागु सोच नगर योजना व नगर निर्माण इकाईतय्गु खः । थज्याःगु योजना निर्माणया सोच व कार्यान्वयनया निंतिं सरकारी कोषं हे तलब नयाः ज्या यानाच्वंपिं नं यक्व दु । आःया अल्पकालीन सोचं लिपा दुरगामी नकारात्मक प्रभाव लाइगु खःसा उकियात जिम्मेवार निकाय व मनूतय्सं आः हे दिका छ्वयेमाः ।

थ्व जिगु कार्यकालय् निर्णय जूगु मखु वा न्हापा जुयाच्वंगु निर्णयया जक कार्यान्वयन खः धकाः लिचिलेगु धयागु गैरजिम्मेवार पलाः खः । येँ सहरया विकास व निर्माणया जिम्मा वास्तविकरुपं येँ महानगरपालिकया खःसा थुकिं जुइगु आर्थिक लबः हानीया खँ मखु, पूर्णरुपं येँ सहरया भिं जुइगु ज्या जुइमाःगु सोच ब्वलंकेमाः ।