किपूया पत्रकारिता तालिम क्वचाल

किपू – किपू नगरपालिकाया ग्वाहालिइ सन्ध्या टाइम्स पिथना प्रा.लि.या ग्वसालय् जूगु न्हय्न्हुयंकंया आधारभूत पत्रकारिता तालिम शनिवाः क्वचाल । तालिमय् सहभागीपिंत दसिपौ लःल्हानादिसें किपू नगरपालिकाया मेयर रमेश महर्जनं ब्वति काःपिंसं थःपिंसं सयेकागु सिइकागुया सदुपयोग यानाः समाचार÷लेख प्रकासन यानावं वन धाःसा नगरपालिकापाखें थप प्रशिक्षणया व्यवस्था मिले यायेगु खँ धयादिल ।

किपू नगरपालिकापाखें भौतिक निर्माणया ज्या लिसें नगरवासीपिनि व्यक्तित्व विकास यायेगु ज्या नं यानाच्वंगु खँ न्ह्यथँसें थ्व हे झ्वलय् न्वचु कला प्रशिक्षण, पत्रकारिता तालिम, सिलाइ तालिम थेंज्याःगु ज्याझ्वः याना वयाच्वनागु खँ कनादिल ।

ज्याझ्वलय् न्ववानादिसें उपमेयर सरस्वति रिजाल खड्कां तालिम कयादीपिंसं थुकियात थःगु रोजगारी कथं हे विकास याना वनेफयेमा धकाः भिंतुना दिल ।

किपूया थीथी वडाया प्रतिनिधित्व यानाः झिप्यम्हेसिनं तालिम काःगु खः । किपू पाखें पिथना वयाच्वंगु वाःपौ नगर सन्देशया उपसम्पादक ज्ञानकुमार महर्जनं तालिमय् सहभागीपिंसं किपुली जूगु थीथी ज्याझ्वःया समाचार संकलन यानाः छ्वयाहःगु समाचार नगर सन्देशय् प्राथमिकता बियाः प्रकाशन यायेगु खँ धयादीगु खः ।

सन्ध्या टाइम्स पिथना प्रा.लि.या अध्यक्ष रमेशकाजी स्थापितया सभपातित्वय् जूगु ज्याझ्वलय् मू प्रशिक्षक सुरेश मानन्धरं पत्रकारिता प्राक्टिकल ज्या जूगुलिं नियमित रुपं च्वयेगु यायेमाः धयादिसें व्यावसायिक पत्रकारिताय् वनेफयेमा धकाः भिंतुनादिल ।

सम्बन्धित बुखँ

LEAVE YOUR COMMENTS