चैतया न्हापांगु वालय् ख्वप महोत्सव

ख्वप – ख्वप नगरपालिकां नेपाल भ्रमण वर्ष–२०२० यात लक्षित यानाः थ्व हे वइगु चैतया न्हापांगु वालय् ख्वप महोत्सव याइगु जूगु दु ।
ख्वप नपां चैतया ४ निसें ८ गतेतक न्यान्हुयंकं ख्वप महोत्सव याइगु जूगु दु । उकिया लागिं ख्वप नगरपालिकां छगू करोड दां विनियोजन यानातःगु दु ।

ख्वपया कला, संस्कृति, जीवनशैली, स्थानीय उत्पादनया प्रवद्र्धन यानाः आन्तरिक व बाह्य पर्यटकयात आकर्षित यायेगु ताः तयाः थुगु महोत्सव यायेत्यंगु खँ ख्वप नगरपालिकां धाःगु दु । थनया शीप, कलाया प्रवद्र्धन जुइगु नापं आन्तरिक व बाह्य पर्यटन अप्वयेकेगु उद्देश्य तयाः नगरपालिकां उगु महोत्सव यायेत्यंगु खः ।

थ्व स्वयां न्ह्यः ख्वप नगरपालिकां २०५४ सालय् नं ख्वप महोत्सव याःगु खःसा २०६९ सालय् उकथं हे ख्वप सतक महोत्सव ग्वसाः ग्वःगु खः । आः वइगु महोत्सवय् २०७२ सालया तःभुखाचं क्षति जूगु विश्व सम्पदास्थल पुनः निर्माण जुइधुंकूगु धासें महोत्सवय् ख्वप देय् चाःहिउ वइपिं पर्यटकतय्त प्रत्यक्ष अवलोकन याकीगु जूगु दु ।

महोत्सवय् हस्तकलाया ब्वज्यालिसें, नेवाः व थीथी नसाज्वलं ब्वज्या, धौ महोत्सव, ब्यापार मेला, नांचा बिहार, शैक्षिक ब्वज्या, चिकेन एण्ड ऐग फेष्टिबल, परम्परागत बाद्य बाजंया प्रदर्शनी नापं थीथी सांस्कृतिक ज्याझ्वः नं जुइगु जूगु दु । महोत्सव तःजिक न्यायेकेत थीथी उपसमिति नीस्वनेगु मेयर सुनिल प्रजापति कनादिल ।