प्रदेश सांसद डा. शाक्यपाखें सांस्कृतिक बाजं ग्वाहालि
येँ- येँ महानगरपालिकाया प्यंगू वडाया ४४ त्वाः, गुथि व बाजं खलःयात परम्परागत बाजंज्वलं लःल्हाःगु दु । परम्परागत संस्कृतिया संरक्षण व उकियात ल्यंकेगु ल्याखं बाजं खलःयात बाजं ज्वलं लःल्हाःगु खः ।
बागमति प्रदेश सांसदलिसें पुलांम्ह मन्त्री डा. अजयक्रान्ति शाक्यं थःगु निर्वाचन क्षेत्र येँ क्षेत्र ९ (क)या प्यंगू वडा १२, १४, २१ व २२ या परम्परागत व सांस्कृतिक त्वाः, गुथिलिसें बाजं खलःयात बाजं ज्वलं लःल्हाःगु खः ।
बागमति प्रदेश सरकारया तत्कालीन उद्योग, पर्यटन, वन तथा वातावरण मन्त्रालयया निंतिं आर्थिक दँ ०७८÷७९ लय् विनियोजन याःगु न्यय्गू लखपाखें प्यंगू वडाया ४४ गू त्वाः, गुथि, खलःलिसें परम्परागत व सांस्कृतिक बाजं खलःयात बाजंज्वलं लःल्हाःगु खः ।
मेघा नेपालया व्यवस्थापनय् थनया खुसिबुँस्थित नेपाः ब्यांक्वेटय् जूगु ज्याझ्वलय् निर्वाचन क्षेत्रया धिमे बाजं खलः, गुंला बाजं खलः, नाय्खि बाजं खलः, भजनमण्डल सहितयात बाजं लःल्हाःगु खः ।
बाजं लःल्हासें ज्याझ्वःया मूपाहां नापं प्रदेश सभा सदस्यलिसें पुलांम्ह मन्त्री डा. शाक्यं नेवाः समुदाय दुने धार्मिक, सांस्कृतिक व परम्परागत रुपय् बाजंया महत्वयात कयाः कुलादीगु खः । वय्कलं थुकथंया परम्परागत बाजं खलकं येँया संस्कृति संरक्षण यायेगु नापं थनया मौलिक संस्कृति व अमूर्त सम्पदाया संरक्षण यायेगु ज्याय् योगदान बिया वयाच्वंगु दु धयादिल ।
उगु इलय् बाजं खलःयात धाः, धिमय्, भुस्याः, नाय्खिं, छुस्याः, ताः, बासुरि, बय्, हार्मोनियम, पछिमा लगायतया बाजं ज्वलं लःल्हाःगु खः ।
LEAVE YOUR COMMENTS