कथिनोत्सवय् दान याःगु ध्यबा थेरवाद विहारयात लःल्हात

थिमि – थनया नगदेशस्थित नगदेश बौद्ध समूहया ग्वसालय् नगदेश बुद्ध विहारय् पवित्र महान कथिनोत्सव वंगु कात्तिक २१ गते विहीवाःकुन्हु जुल । विहारय् वर्षावास अनुष्ठान च्वना बिज्याःम्ह थाई भिक्षु खनो· महास्थिविरया कृतज्ञ गुणस्मरण यासें उगु कथिनोत्सव ज्याझ्वः जूगु खः ।

अनागारिका केशावती गुरुमांया सक्रियताय् जूगु ज्याझ्वः बुद्धपुजा यासें न्ह्याःगु खः । ज्याझ्वः न्ह्याके स्वयां न्ह्यः सांस्कृतिक बाजंसहित सलंसः उपासकउपासिकाया सहभागिताय शोभायात्रा यासें नगदेश परिक्रमा याःगु खः । वयां लिपा भिक्षु महासंघपाखें अखिल नेपाल भिक्षु महासंघया निवर्तमान नायः भिक्षु बोधिसेन महास्थविरपाखें पंचशील ग्रहण यासें बुद्ध पुजा यानाः ज्याझ्वः न्ह्याकूगु खः ।

ज्याझ्वलय् भिक्षु पञ्ञारत्नं कथिनोत्सवया महत्वलिसें बुद्ध शासनिक क्षेत्रय् दुु ऐतिहासिक उपादेयतायात कयाः धम्मदेशना बियाबिज्यात । वसपोलं २६०० दँ न्ह्यवंनिसें आतक नं निरन्तर रुपय् कथिन चीवर दान ज्याझ्वः न्ह्यानाच्वंगु धासें थुकिया महत्वयात कयाः कनाबिज्याःगु खः ।

अनागारिका खमेसी गुरुमां नापं नीम्ह कथिनदातां मंकाःकथं श्रद्धेय भिक्षु गणयात पवित्र कथिन चीवर दाना याना बिज्यायेधुंकाः वयां लिपा विहारया उपासक उपासिका नापं सर्वसाधारणं दान प्रदान यानादीगु खः । उगु कथिनोत्सवय् दातातय्सं दान याःगु अष्टपरिष्कारमध्ये एकमुष्ट रुपय् स्वंगू लाख न्यय्न्याद्वः व न्यासः तका दां लुम्बिनी दयेकाच्वंगु थेरवादी विहारया निंतिं लःल्हाःगु खः ।