४० लाख कोरोना खोप सितिकं वन

येँ (नेपालभाषा टाइम्स)- कोरोना भाइरसविरुद्ध हयातःगु ४० लाख डोज खोप आः सितिकं वनीगु जूगु दु । चीन सरकारं नेपाःयात अनुदान बियाहःगु कोरोना भाइरसविरुद्धया साइनोभ्याक खोप ४० लाख मात्रा सितिकं वनेत्यंगु खः ।

बुस्टर डोजया रुपय् छ्यले मिले मजूगुलिं थ्व खोप गोदामय् थन्के जुयाच्वंगु खः । चीनं वंगु २०७८ वैशाख १२ र १४ गते उगु खोप छ्वया हःगु खः । वैशाख १२ गते ३४ लाख ४३ हजार ३६० मात्रा व वैशाख १४ गते पाँच लाख ५६ हजार ६४० मात्रा खोप नेपाः वःगु खः । व्यवस्थापन महाशाखाया निर्देशक डा सर्वेश शर्मां धयादिल, ‘आः ला कोरोना भाइरसया महामारी नं मदु । खोपया म्याद नं फुइत्यंगु दु । उकिं आः थ्व जिमिसं छ्यले फइ मखु ।’

खोपया म्याद थ्वहे पुस ७ गते तक जक दनि । थ्व ज्या लगे मजूगु खोप छु यायेगु धकाः महाशाखां मन्त्रालययाके न्यनाच्वंगु दु । विश्व स्वास्थ्य सङ्गठनं थ्व खोप बुस्टर डोजया लागिं उपयुक्त मजू धायेवं खोप बीगु बन्द याःगु खः ।