ने. सं. ११४४ कौलाथ्व तृतीया -

काभ्रेया विमानस्थल विवादय्

जग्गा अधिग्रहण याये मफइगु जूगुलिं विमानस्थल म्वाःगु निष्कर्ष

येँ – येँया त्रिभुवन अन्तर्राष्ट्रिय विमानस्थलय् जुइगु चाप म्हो यायेगु लागिं काभ्रेया नागेडाँडाय् न्हूगु विमानस्थल दयेकेगु धकाः जुयाच्वंगु कुतः आः वयाः अन्यौलय् लाःगु दु । खास यानाः अन विमानस्थल दयेकेगु लागिं जग्गा अधिग्रहण यायेगु सवालय् विवाद वइगु सम्भावना खने दयेवं संसदीय समितिया छगू उपसमितिं अन विमानस्थल दयेकेमाःगु आवश्यकता मदु धइगु रिपोर्ट बीवं थ्व अन्यौल पिहां वःगु खः ।

संसदया श्रम समितिं गठन याःगु छगू उपसमितिं काभ्रेया नागेडाँडाय् न्हूगु विमानस्थल दयेकेगु बारे स्थलगत अध्ययन याःगु खः । अध्ययन लिपा उगु उपसमितिं उगु थासय् आः न्हूगु विमानस्थल दयेकेमाःगु आवश्यकता मदु धइगु रिपोर्ट बिउगु खः ।

उपसमितिं बिउगु रिपोर्टय् जग्गा अधिग्रहण याये थाकुइगु खँ धयातःगु मदुसां अन जग्गा जक अधिग्रहण यायेत हे खुदँनिसें न्हय्दँ तक बीगु सम्भावना दुगु व अबले तकया दुने निजगढ व भैरहवाया अन्तर्राष्ट्रिय विमानस्थलं अपरेशन शुरु यायेधुंकीगु व निजगढया फास्ट ट्राय्कं घौछिया दुने राजधानीयात तराईलिसे स्वाइगु जूगुलिं न्हूगु विमानस्थल आवश्यक मजुइगु रिपोर्ट बिउगु खः ।

उखे नागरिक उड्डयन प्राधिकरणं धाःसा थौंकन्हय् त्रिभुवन अन्तर्राष्ट्रिय विमानस्थलय् यक्व उडान जुयाः यक्व डिस्टर्ब जुयाच्वंगु कारणं काभ्रेय् न्हूगु विमानस्थल मदयेकुसें मगाः धइगु बिचाः न्ह्यःने हयाच्वंगु दु । उकिया लागिं प्राधिकरणं सरकार दुने लबिङ नं यानाच्वंगु दु । तर आः थुकिया बारे अध्ययन यायेत गठन याःगु संसदया उपसमितिं हे विमानस्थल आवश्यक मजू धकाः रिपोर्ट बिउगुलिं संसदया उपसमिति व सरकारी निकाय दथुइ अन्यौल ब्वलंगु खः ।

सूत्रतय्सं धाः कथं न्हापा उगु थासय् विमानस्थल दयेकेगु लागिं स्थानीय जनतां जग्गा उपलब्ध याकेगु सवालय् सकारात्मक बिचाः न्ह्यःने तःगु खः । तर विमानस्थल दयेकेधुंकाः नं उगु लागाया खास विकास जुइगु सम्भावना मदइगु व स्थानीय जनताया कृषियोग्य बुँ जक सितिकं वनीगु खँ पिहां वयेवं जग्गा अधिग्रहण याकेगु सवालय् नकारात्मक खँ पिदंगु खः ।

संसदीय उपसमितिं धाः कथं थौंकन्हय् नेपाःया थीथी पहाडी लागाय् निर्माण सम्पन्न जुइधुंकूगु विमानस्थलत नं बांलाक प्रयोग याये मफुगु कारणं काभ्रेया थ्व विमानस्थलया अवस्था नं अथे हे जुइगु सम्भावना यक्व दु । लिसें थ्व विमानस्थल दयेके सिधइगु इलय् तक नेपाःया थीथी लागाय् थौंकन्हय् निर्माण जुयाच्वंगु अन्तर्राष्ट्रियस्तरया विमानस्थलत अपरेशनय् वयाः येँया त्रिभुवन अन्तर्राष्ट्रिय विमानस्थलया चापयात यक्व कम याना बीगु जुयाः उकिया हे लागिं धकाः मेगु विमानस्थल आवश्यक जुइ मखु धइगु नं उपसमितिया ठहर दुगु खँ धाःगु दु ।