राष्ट्रपति जिनपिङया सम्बोधन ताइवान व हंगकंगयात कयाः कडा ख्याच्वः

चीनया राष्ट्रपति शी जिनपिंगं मंगलवाः झिंस्वक्वःगु नेशनल पिपल्स कंग्रेसय् संवोधन याःगु दु । निक्वःगु कार्यकालया निंतिं नकतिनि निर्वाचित जूम्ह राष्ट्रपति जिनपींगं थ्व पालय् तसकं आक्रमक भाषण बियादीगु दु । चीन विश्वय् थःगु थाय् दयेकेगु निंतिं पूवंक आश्वस्त दु धासें वय्कलं चीनया कायाकल्प हे चिनियातय् तःधंगु म्हगस खः धयादीगु दु ।थ्व झ्वलय् वय्कलं थुकिया निंतिं थःपिं न्ह्याथेंज्याःगु लडाइ ल्वायेत नं तयार दु धासें धयादिल, ‘झीपिं थः दुश्मन विरुद्ध हिंसात्मक लडाई ल्वायेमाःसां कृतसंकल्प दु । झीपिं विश्वय् बल्लाःगु थाय् कायेगु निंतिं संकल्पबद्ध दु ।’अथेहे वय्कलं ताइवान व हंगकंगया स्वतन्त्रताया समर्थकतय्त ख्याच्वः नं बियादीगु दु । राष्ट्रपति जिनपिंगं धयादीगु दु । चीनया १ इञ्ची जमिन नं सुनां कायेफइमखु । जिनपिङं थथे धयादीबलय् कंगे्रेस दुपिं सकसिनं लापा थानाः लसकुस याःगु खः ।

सन् १९४९ य् चीनय् गृहयुद्ध खतम जुसां निसें ताइवानय् स्वतन्त्र सरकार दु । चीनं ताइवानयात थःपिनिगु हे ब्वः धया वयाच्वंगु दु, आवश्यक जुल धाःसा थःगु नियन्त्रणय् कायेगु खँ नं धयाच्वंगु दु । जिनपिङं धाःगु दु, ‘झीसं झीगु सम्प्रभुता व क्षेत्रीय एकताय् नियन्त्रण याये आवश्यक दु । झीसं न्ह्यागु हालतय् नं मातृभूमिया एकता सुनिश्चित यायेमाः ।’ ताइवान व हंगकंगयात कयाः चीनं बिउगु थ्व दकलय् मध्ये आक्रामक प्रतिक्रिया जूगु खँ धाःगु दु । छुं न्हि न्ह्यव जक अमेरिकां छगू कानुन पास यानाः ताइवानय् अमेरिकाया उच्च अधिकारीतय् छ्वयेगु खँ धाःगु खः । अमेरिकी राष्ट्रपति डोनाल्ड ट्रम्पया थ्व पलाःया प्रतिक्रिया स्वरुप जिनपिङया थ्व कडा धापू वःगु खः ।