संक्रमित संक्रमित चाःहिउवःबलय्…

एजेन्सी – अमेरिकी राष्ट्रपति डोनाल्ड ट्रम्प कोभिड १९या उपचार यानाच्वनागु झ्वलय् हे अस्पतालं पिहां वयाः थः समर्थकतय्त अजूचायेकाबिउगु दु। ट्रम्प छुं ईया निंतिं अस्पतालय् मू वयाच्वंपिं थः समर्थकतय् न्ह्यःने ल्हाः संकाः मोटरय् च्वनाः चाःहिउवःगु खः ।

ट्रम्पं थःम्हं अजूचायापुक भ्रमण यायेगु धकाः ट्विट याःगु छुं ई लिपा हे मास्क तयाः कारय् च्वनाः चाःहिउवःगु खः । महामारी नियन्त्रणया नीतियात कयाः आलोचित जुयाच्वंम्ह ट्रम्पं भाइरसपाखें थःम्हं यक्व सयेकागु खँ नं धाःगु दु ।

थ्वयां न्ह्यः चिकित्सकतय्सं ट्रम्पया स्वास्थ्य सुधार जुइगु झ्वलय् दुगु व सोमवाः अस्पतालं डिस्चार्ज जुइफुगु खँ धाःगु खः । ट्रम्पया उपचारय् संलग्न डा. सीन कोन्लीया कथं संक्रमति जुइधुंकाः ट्रम्पया निक्वः तक अक्सिजनया मात्रा कुहां वःगु व डेक्सामेथासोन नांया स्टेरोइड बियागु खँ धाःगु दु। थ्व छगू कथंया म्ह स्याःगु म्हो याइगु हर्मोनं थें ज्या याइगु वासः खः ।

थ्वहे दथुइ ट्रम्पं ट्विटय् थःत थ्व इलय् धाथें स्कूलय् वना थें जुयाच्वंगु खँ धाःगुदु। वय्कलं धयादीगु दु, ‘थ्व धाथें स्कूल वना थें जुल । थ्व सफू ब्वंकीगु विद्यालय मखु। जिं छुं सयेका सीका व धाथें न्ह्यइपु। थुकिया बारे जिं जानकारी बी तिनि ।’

ट्रम्पं कोरोना भाइरसयात बेवास्ता याःगु धकाः तःधंगु आलोचना जुइगु याः । वय्कलं मास्क तयाः जूगु तसकं म्हो हे जक खनेदुगु खःसा सामाजिक दूरी नं कायम याइम्ह मखु। कोरोना संक्रमण जुइवं ट्रम्पया राष्ट्रपति चुनाव अभियान नं अन्योलय् लानाच्वंगु दु। ट्रम्प वइगु नोवेम्भर ३ तारिखय् जुइगु राष्ट्रपति चुनावया निंतिं रिपब्लिकन पार्टीपाखें उम्मेदवार जुयाच्वंम्ह खः ।