इटलीइ स्वसलं मल्याक माफियाविरुद्ध सुनुवाई

एजेन्सी – इटलीइ छक्वलं हे स्वसलं मल्याक माफियातय् विरुद्ध सुनुवाई जुइत्यंगु दु । थ्व सुनुवाईया निंतिं अदालतय् थाय् मगाइगु जूगुलिं छगू कलसेन्टरयात पुनर्निर्माण यानाः सुनुवाइ कक्ष दयेकूगु दु ।

इटलीया दकलय् शक्तिशाली माफिया पुचः धकाः कुख्यात ड्रब्गेटा पुचःया दुजःतय् विरुद्ध थ्व सुनुवाई जुइत्यंगु खः । इटली दशकौं लिपा हाकनं थज्याःगु कथं सुनुवाई जुइत्यंगु खः । सन् १९८० लिपा इटलीइ थुकथं तःधंगु सुनुवाई जुइत्यंगु खः । वर्षौं ताःहाकःगु अनुसन्धान लिपा ड्रब्गेटा समूहया ३३५ म्ह लुटेरा लिसें भ्रष्ट अधिकारीतय् विरुद्ध मुद्दा दायर जूगु खः ।

सुनुवाईया झ्वलय् गुसःम्हं मल्याक साक्षीतय्सं हत्या, लागू वासः ओसारपसार, हाकूगु धन व जबर्जस्ती असुलीविरुद्ध प्रमाण बीहइगु अनुमान यानातःगु दु । बुधवाःनिसें न्ह्याइगु सुनुवाई निदँ तक न्ह्यानाच्वनीगु अनुमान दु । सुनुवाईया झ्वलय् सलंसः मनूत सहभागी जुइफुगुलिं लामेजिया टेर्मे सहरय् च्वंगु छगू कल सेन्टर भवनयात हे सुनुवाई यायेगु थाय् दयेकूगु खः ।

आः सुनुवाई जुइत्यंगु माफियात ड्रब्गेटा पुचः दुनेया नं मनकुसो परिवार धकाः म्हसीका दुगु पुचःया दुजःपिं खः । सन् १९८६-१९९२ य् जूगु सुनुवाईलय् सिसिलीया कोसा नोस्ट्रा परिवारया दुजःपिं लाःगु खः । ड्रब्गेटा कोसा नोस्ट्रा स्वयां तःधंगु पुचः खः ।