अस्ट्रेलियाय् खोप कायेधुंकूपिं पर्यटकयात प्रवेश अनुमति

एजेन्सी- अस्ट्रेलियाय्  कोरोना विरुद्धया पूर्ण मात्रा खोप कायेधुंकूपिं विदेशी पर्यटकतय्त प्रवेशया अनुमति बिउगु दु । अस्ट्रेलियाय् प्रधानमन्त्री स्कट मोरिसनं फेब्रुअरी २१ तारिखनिसें अस्ट्रेलियाय् वइपिं विदेशी पर्यटकतय् निंतिं अन्तर्राष्ट्रिय सिमाना चायेकेगु घोषणा याःगु खः ।

प्रधानमन्त्री मोरिसनं सोमवाः सञ्चार माध्यमत लिसे खँ ल्हायेगु झ्वलय् पर्यटकतय्त लसकुस यायेगु जानकारी बिसें धाःगु दु ‘जिमिसं अस्ट्रेलियाया सिमाना बन्द यानागु थ्यंमथ्यं निदँ दत । यदि छिकपिंसं कोरोनाया निगुलिं मात्रा खोप कयादीधुनसा छितः अस्ट्रेलियाय् लसकुस यायेत जिपिं च्वंच्वनाःगु दु ।’ अन्तर्राष्ट्रिय हवाइ यातायात संघं मोरिसनया घोषणायात लसकुस याःगु दु ।

अस्ट्रेलिया‌ं आप्रवासी ज्यामि व विद्यार्थीतय् निंतिं सिमाना चायेकेधुंकूगु दु । अस्ट्रेलियाय् छुं ई न्ह्यः कोरोना संक्रमण दर थहां वनाच्वंगु खःसा आः धाःसा संक्रमण दर कुहां वयाच्वंगु दु । सोमवाः अस्ट्रेलिया‌ं २३ द्वः संक्रमित थप जूगु दु ।

सम्बन्धित बुखँ

LEAVE YOUR COMMENTS