अमेरिका-इरान द्वन्द्व जारी

बीबीसी – अमेरिका व इरान दथुइ द्वन्द्व जारी हे जुयाच्वंगु दु । अमेरिकी सेनां इरानय् न्हूगु चरणया हवाई आक्रमण शुरु यानागु व सफलतापूर्वक उकियात क्वचायेकागु धाःगु दु ।

अमेरिकी सेनाया केन्द्रीय कमान्ड सेन्टकमं बुधवाः चान्हय् अमेरिकी ईकथं ९ ताः इलय् सैन्य अभियान क्वचायेकागु सामाजिक संजालपाखें जानकारी बिउगु खः । सेन्टकमया कथं लिपांगु इलय् जूगु आक्रमणय् इरानया सैन्य कमान्ड केन्द्र, हवाई रक्षा प्रणाली, क्षेप्यास्त्र व ड्रोन संचालन क्षमता, समुद्र तटय् च्वंगु निगरानी केन्द्रयात निशाना दयेकूगु खः ।

अमेरिकां याःगु लिपांगु थ्व आक्रमण इरानं होर्मुज जलमार्गय् संचालन जुइगु व्यापारक जहाज लक्षित आक्रमण वा खतरायात कमजोर यायेगु निंतिं जूगु दावी याःगु दु । थ्वयां न्ह्यः बुधवाः सुथय् नं अमेरिकी सेनां ९० मिनेट तक सैन्य अभियान न्ह्याकूगु खः ।

थुखे अमेरिका व इरान दथुइ हाकनं द्वन्द्व शुरु जुइवं निगू देय्या दथुइ वार्ताया निंतिं कुतः याना वयाच्वंगु पाकिस्तानं थःपिंसं अझ नं सार्थक वार्ताया निंतिं कुतः याना हे च्वनेगु धाःगु दु ।

पाकिस्तानी विदेश मन्त्रालय या प्रवक्ता ताहिर अन्द्राबीं पत्रकारतलिसे खँल्हाबल्हा यासें उगु खँ धाःगु खः । पाकिस्तानया हे मध्यस्थताय् निगू देय् दथुइ वार्ता जुयाः युद्ध अन्त्य यायेगु तकया सम्झौता पती ल्हाःचिं तकं तयेगु ज्या जूगु खः । छुं दिंया दुने निगू देय् दथुइ शान्ति सम्झौता जुइगु धयाच्वंगु हे इलय् हाकनं युद्ध जुइवं पाकिस्तानं उकथंया प्रतिक्रया बिउगु खः ।